لەقەزای سێمێل بە گوژمەی ٣٥ ملیار دینار پڕۆژەی نوێ جێبەجێ دەکرێن

لە قەزای سێمێلی سەر بە پارێزگای دھۆک بە گوژمەی ٣٥ ملیار دینار ژمارەیەک پڕۆژەی نوێ دەچنە بواری جێبەجێکردن، قایمقامی قەزاکەش دەڵێ: لە ئایندەیەکی نزیک ئەو پڕۆژانە جێبەجێ دەکرێن.

خەلیل مەحموود، قایمقامی قەزای سێمێل بە ماڵپەڕی فەرمیی پارتی دیموکراتی کوردستانی راگەیاند: حکوومەتی ھەرێمی کوردستان بەردەوامە لەسەر پرۆسەی ئاوەدانی و لەو چوارچێوەیەدا بەمگوژمەی ٣٥ ملیار دینار چەندین پڕۆژەی نوێی خزمەتگوزاری لە سنووری قەزای سێمێل جێبەجێ دەکات، پڕۆژەکان لە قۆناغی تەندەردان و لە ئایندەیەکی نزیک دوای تەواوبوونی رێو شوێنی یاسایی و کارگێڕی دەست بە جێبەجێکردنیان دەکرێت.
قایمقامی سێمێل گوتیشی: پڕۆژەکان زۆربەی بوارەکان لەخۆ دەگرن، لەوانە دروستکردنی یاریگا، شەقامی ٣٠ی مەتری و ٦٠ مەتری لە سەنتەری قەزاکە و چەندین پڕۆژەی دیکەی خزمەتگوزاری.

خەلیل مەحموود ئاماژەی بۆ ئەوە کرد: دەسەڵات بە ھەموو شارەوانییەکان دراوە بۆ ئەوەی زەوی بفرۆشن  و لەبەرامبەردا پڕۆژە جێبەجێ بکرێن، لە سنووری سەرۆکایەتی شارەوانی سێمێل تا ئێستا بە گوژمەی پێنج ملیار دینار زەوی فرۆشراوە و ئەو پارەیە ھەمووی بۆ گەیاندنی خزمەتگوزاری بەکاردێ.

قائید میرۆ