سەرۆکی لیستی پارتی لە کەرکووک: بەڵێن دەدەین ڕێگری لە گەندەڵی بکەین

کەرکووک_KDP.info_ سەرۆکی لیستی پارتی دیموکراتی کوردستان  لە کەرکووک دەڵێت: پارتی دەبێتە سەر مەشقی پێکەوەژیان لە کەرکووک و بەڵێن دەدەین رێگری لە گەندەڵی بکەین و گەندەڵکاران بەسزای خۆیان بگەینین، بۆ ئەوەی چیتر کەس جورئەت نەکات دەست بۆ موڵکی گشتی ببات.
حەسەن شێخانی، سەرۆکی لیستی 197ی پارتی دیموکراتی کوردستان بۆ ئەنجوومەنی پارێزگای کەرکووک و کاندیدی ژمارە 1 لە لیستی پارتی، بۆ ماڵپەڕی فەرمیی پارتی دیموکراتی کوردستان گوتی: گومانی تێدا نییە گەڕانەوەی پارتی بۆ کەرکووک مژدە بەخشە بۆ خەڵکی کەرکووک و بۆ نەیارانیش گورزێکە، ئێمە بە ڕێنمایی سەرۆک بارزانی بەرنامە و سەرمەشقی کارەکانمان لەوشارە پێکەوەژیان و یەکتر قبوڵکردنە، بۆیە بەو نەفەسە کار دەکەین ببینە چەترێک بۆ تەواوی نەتەوە و ئاین و ئاینزاکان و پێکەوە ئەو دۆخە ناهاوسەنگەی لە شار هەیە بۆ دۆخی ئەساسی خۆی بگێڕینەوە و تەعریب ڕاگرین، چونکە ئێمە پارتی دیموکراتی کوردستانین و کەرکووک شارێکی کوردستانییە و مافی هەموو پێکهاتەکانە بەئارامی بژین.
حەسەن شێخانی گوتیشی: ئێمە پرۆسەی بانگەشەی هەڵبژاردن بە ئارامی بەڕێوە دەبەین، کاری ئێمە ئەوەیە فەلسەی ڕێبازی پیرۆزی بارزانی بە خەڵک بڵێین و پێویستمان بە هیچ شتێک نابێت، ئێمە لەسەر ئەو ڕێبازە فێرکراوین نە حەقمان دەخورێت و نە حەقی کەسیش دەخۆین، بۆیە بەپێی بەرنامەی خۆمان کار دەکەین  و  سازش لە سەر کوردستانییەتی کەرکوک ناکەین و ڕێگری لە تەعریب دەکەین، بەڵێن بەخەڵکی خۆمان دەدەین گەندەڵکاران ڕادەگرین کە چووینە ناو ئەنجوومەنیش سزایان دەدەین بۆ ئەوەی جارێکی دیکە جورئەتی ئەوە نەکەن دەست بۆ موڵکی گشتی ببەن.

بڵند ئیبراهیم