ل دهۆك.. ژبۆ پاراستنا گیانێ شوفێران سیسته‌مه‌كێ نوى یێ راداران هاتییه دانان
ئه‌ڤرۆ 16ى هه‌یڤا 11 ساڵا 2023ێ رۆژا چوارشه‌مبێ و هه‌ر ل دانێ سپێدێ تورا نوى یا كامیرێن زێره‌ڤانیێ ل سه‌نته‌رێ پارێزگه‌ها دهۆكێ و ئیدارا سه‌ربه‌خۆ یا زاخۆ كه‌فتنه وارێ جێبه‌جێكرنێ,
پشتى هاتنا وه‌رزێ زڤستانێ و ژبۆ پاراستنا گیانێ شوفێران و كێمكرنا هژمارا رویدانێن ترافیكى رێڤه‌به‌رییا گشتى یا هاتن و چوونا پارێزگه‌ها دهۆكێ رابوویه ب دانانا جوره‌كێ نوى یێ كامیرێن چاڤدێرییا له‌زاتییا ترومبێلان بۆ هندێ ب شێوازه‌ك باشتر كونترول سه‌ر له‌زاتییا جاده‌یان بهێته كرن و شوڤێر ژی ب شێوازەک باشتر پێگیرى رێنمایێن جاده‌ى ببن.
عه‌قید ئازاد تاها, به‌رپرسێ راگه‌هاندنا رێڤه‌به‌رییا گشتى یا هاتن و چوونێ ل پارێزگه‌ها دهۆكێ راگەھاند: مه‌به‌ستا مه ژدانانا ڤان كامیره‌یان پاراستنا شوفێرانه ژرویدانێن ترافیكى، ل ده‌مه‌كێ ئه‌ڤ كامیره ل وان جهان هاتینه دانان یێن ب گور ئامار و داتایان رویدان و گرفتێن مه‌زن یێن ترافیكى لێ په‌یدا دبن و ب ڤى ره‌نگى پێگیریا شوفێرى ب له‌زاتییا داناى ب هەبووما کامیرەیان دێ وان رویدان و زیانان كێمتر لێ كه‌ت.
كامیرێن نوى ل 5 جاده‌یێن سه‌ره‌كى یێن سه‌نته‌رێ پارێزگه‌ها دهۆكێ و 6 جادەیێن سەرەکی یێن ئیدارا سەربەخۆ یا زاخۆ هاتینە دانان، كو ئێكه‌م جاره ئه‌ڤ جورە كامیره ب هێنه دانان و جوداهییا وان دگه‌ل كامیرێن دى ئه‌وه كو ب شێوازه‌ك باشتر فوكسا جاده‌ى و ترومبێلان ده‌ردئێخیت هه‌روه‌سا شێوازێ به‌ستنا وان جوداتر و رێك و پێك تره و گرتنا وێنه‌ى ژبۆ هه‌ردوو سایدێن هاتن و چوونێ دگریت و هه‌ر ده‌ما شوفێرى پایا له‌زاتییا جاده‌ى شكاند, وێنه‌ى ژبۆ ترومبێلێ دگریت, و دگه‌ل دا ئه‌گه‌ر دوێنه‌یێ ترومبێلێ دا سه‌رپێچییه‌ك دى دیاربوو وه‌كو نه گرێدانا قاویشا سلامه‌تیێ یان هه‌لگرتنا موبایلێ ئه‌و سه‌رپێچى ژى دێ دگه‌ل سه‌رپێچییا له‌زاتیێ هێته هژمارتن.
جهێن كامیره‌یێن نوى لێ هاتینه دانان, سه‌نته‌رێ پارێزگه‌ها دهۆكێ:
1. جادا بارزان به‌رامبه‌ر جادا پێشه‌سازییا كه‌ڤن.
2. جادا شه‌هیدێن ئێكى شواتێ به‌رامبه‌ر سه‌ندیكا نوژدارێن كوردستانێ لقى دهۆك.
3. جادا مالتایێ به‌رامبه‌ر باغچێ گیانه‌وه‌ران.
4. جادا زركا به‌رامبه‌ر مه‌شته‌لێن مالتایێ.
5. جادا نه‌خۆشخانا ئازادى به‌رامبه نه‌خۆشخانا ڤه‌ژین.
جهێن كامیرێن نوى لێ هاتینه دانان, سه‌نته‌رێ ئیدارا سه‌ربه‌خۆ یا زاخۆ:
1- جادا بێدارێ.
2- جادا رێڤه‌به‌رییا ره‌وشه‌نبیرى و كوچكا هونه‌رى.
3- جادا ئاشتى.
4- جادا كوردستان زاخۆ.
5- جادا تلكه‌به‌رێ.
6- جادا پێشمه‌رگه.
ئه‌و جاده‌یێن سه‌ره‌كى یێن كامیرە لێ هاتینه دانان تابلویێن نوى ژى ل سه‌ر هاتینه زێدەکرن كو تێدا له‌زاتییا جاده‌ى ل سه‌ر دیاركرییه بۆ هندێ شوفێر ل سه‌ر له‌زاتییا جاده‌ى ئاشنابیت, هه‌روه‌سا به‌رییا پرۆسا كاركرنا كامیرێن نوى بهێته بجه ئینان ب 10 رۆژان به‌رده‌وام ئاگه‌هدارییا خه‌لكێ ژلایێ راگەهاندنا رێڤەبەرییا هاتن وچوونێ ل پارێزگەها دهۆکێ و زاخۆ دهاته كرن ژبۆ ئاشنابوون ل سه‌ر له‌زاتییا جاده‌ى و شێوازێ كارکرنا کامیران.
ل پارێزگه‌ها دهۆكێ ب گشتى نێزیك 235 هزار ترومبێلان هه‌نه (ژماره دهۆك), ژبلى وان ترومبێلێن رێڤینگ و گه‌شتیاران كو یێن (ژماره اربیل, سلیمانیه, كركوك, صلاح الدین, فحص موقت, ترومبێلێن ئوروپى) كو رۆژانه ل پارێزگه‌ها دهۆكێ هاتن و چوونێ دكه‌ن.
سه‌جا شێرزاد-دهۆك
