بەرپرسی پەیوەندییەکانی دەرەوەی پارتی و بەڕێوەبەری بیگلس ئەکادیمی کۆبوونەوە
هەولێر-KDP.info- هۆشیار سیوەیلی، بەرپرسی پەیوەندییەکانی دەرەوەی پارتی دیموکراتی کوردستان، پێشوازی لە ڕامۆن هانس، بەڕێوەبەری بیگلس ئەکادیمی و ئەڤرلز میرۆ، بەڕێوەبەری ئینستیتیوتی بین داڤۆس بۆ پێگەیاندنی ئەکادیمی کرد.
لەو دیداردا، باس لە هاوکاریی ئینستیتیوتی ناوبراو کرا بۆ گەشەپێدانی توانای مرۆیی و تواناسازی لە بواری پیشەییدا. ڕامۆن هانس، ئاماژەی بە ئینستیتیوتی بیگلس ئەکادیمی کرد، کە کاری هاوکاری و هەماهەنگییە لە نێوان دامودەزگا تایبەت و حکوومییەکاندا بۆ پەرەپێدانی توانا مرۆییەکان و دابین و دەوڵەمەندکردنی ئەو پیشانەی کە پێویستن.
لە بەشێکی دیکەی ئەو دانیشتنەدا، باس لە پێکەوەکارکردن کرا بۆ دروستکردنی پەیوەندی و هاوکاریی دوولایەنە بە ئامانجی پێگەیاندنی کادر بۆ پیشە پێویستەکانی بازاڕی کار و پڕکردنەوەی ئەو بۆشاییەی کە هەیە و بەدەستهێنانی توانای پێویست لە کاتی جێبەجێکردنی ئەرکەکاندا.
جەختیش کرایەوە کە کوردستان خاوەنی سەرچاوەیەکی مرۆیی زۆرە و بازاڕ و دامودەزگاکان پێویستیی زۆریان بە کەسانی خاوەن پیشە هەیە و بەڕێز هانس ئامادەیی خۆیانی پیشان دا بۆ یارمەتیدانی ئەو کەسانەی کە دەیانەوێت بۆ ڕاهێنان و باشترکردنی پیشەکانیان سەردانی ئەڵمانیا بکەن، بەرپرسی پەیوەندییەکانی دەرەوەی پارتیش دووپاتی هاوکارییانی کردەوە.
