ل دهۆک.. ١١مین خۆلا دەرچوونا قۆتابیێن زانکۆیا پولیتەکنیک ب رێڤەچوو

ئەڤرۆ ل سەنتەرێ پارێزگەها دهۆک، ویانا دهۆک یا وەرزشی ب ئامادەبوونا پ.د ئاری عادل سەرۆکا زانکۆیا پولیتەکنیک دهۆک، و پارێزگارێ پارێزگەها دهۆکێ د. عەلی تەتەر و چەندین بەرپرس و رێڤەبەرێن دەزگەهێن حزبی و میری و خێزانێن قۆتابی و قۆتابییان، گەرا ١١ێ یا دەرچوونا قۆتابیێن زانکۆیێن پولیتەکنیک-دهۆک ب رێڤەچوو،

ب گور گوتنا سەرکەفت رەشید، بەرپرسێ راگەهاندنا زانکۆیا پولیتەکنیک یا دهۆکێ دئەڤ ساڵە دا ل ڤێ خولێ  ٣ هزار و ٤٥٣ قۆتابی دێ باوەرنامەیێن خۆ یێن بکالوریوس و دبلوم وەرگرن، هەروەسا ٦٠ قۆتابی دێ باوەرنامەیێن خۆ یێن ماستەر و دکتورا وەرگرن، ل دەمەکێ هەر ژساڵا ٢٠١٢ێ وهەتا ئەڤ ساڵە ٢٠٢٣ێ ٤٨ هزار قۆتابی ژزانکۆیا پولیتەکنیک-دهۆک دەرچووینە.

ساڵ بۆ ساڵێ زانکۆیا پولیتەکنیک ل هەرێما کوردستانێ و پارێزگەها دهۆکێ پێشڤەچوونێ دبوارێن خواندنێ دا دبینیت و ساڵانە پشکێن نوی و دەگمەن یێن خواندنێ ل سەر ئاستێ پارێزگەها دهۆکێ و هەرێما کوردستانێ و عیراقێ ڤەدکەت، و ب تنێ دئەڤ ساڵە دا دوو پشکێن خواندنێ یێن نوی ل پولیتەکنیکا دهۆکێ هاتینە ڤەکرن ئەوژی پشکا چێکرنا ددانان، هەروەسا پشکا تەکنولوجیا بەرهەمێن خۆراکی ب هەماهەنگی دگەل رێکخراوا یونیسێف.

زانکۆیا پولیتەکنیک یا دهۆکێ ل ساڵا ٢٠١٢ێ هاتییە دامەزراندن کو ئێکەم زانکۆیا تەکنیکی یە ل دهۆکێ هاتییە دروستکرن، و نوکە ژپێنج کولیژ و شەش پەیمانگەهێن تەکنیکی پێک دهێت.

سەجا شێرزاد-دهۆک