ل سەنتەرێ پارێزگەها دهۆکێ سەنتەرێ چارەسەرییا نەخۆشییا پەنجەشێرێ ب تیشک هاتە ڤەکرن

ل سەنتەرێ پارێزگەها دهۆکێ بۆ ئێکەم جار مەزنترین سەنتەرێ چارەسەرییا نەخۆشییا پەنجەشێرێ ب تیشک هاتە ڤەکرن ب کوژمێ زێدەتری ١٦ ملیار دینارێن عیراقی ل سەر ئەرکێ حکومەتا هەرێما کوردستانێ.

ئەڤرۆ رۆژا دووشومبێ رێکەفتی ٦ی هەیڤا ١١ ساڵا ٢٠٢٣ێ مەسرور بارزانی سەروکێ حکومەتا هەرێما کوردستانێ بەرێ بنیاتێ بۆ ئێکەم سەنتەرێ چارەسەرییا نەخۆشییا پەنجەشێرێ ل سەنتەرێ پارێزگەها دهۆکێ دانا، ئەڤ سەنتەرە ئێک ژمەزنترین سەنتەرێن چارەسەرییا پەنجەشێرێ یە ب تیشک ل هەرێما کوردستانێ، و جهێ وێ دێ کەڤیتە ل سەر جادا ئێتیتێ ل سەنتەرێ قەزا دهۆک-پارێزگەها دهۆک، وتێدا 5 بەش یێن چارەسەریێ دگەل 130 ژووران دێ هێنە دروستکرن.

ئەفراسیاب موسا، رێڤەبەرێ رێڤەبرییا گشتی یا ساخلەمییا پارێزگەها دهۆکێ: بەری نوکە نەخۆشێن مە نەچاربوون چارەسەرییا خۆ ل سەنتەرێن پارێزگەهێن هەولێر وسلێمانیێ وەربگرن یان سەرەدانا ژدەرڤەی وەڵاتی بکەن بۆ وەرگرتنا چارەسەریێ، لێ ژبەر زێدەبوونا رێژا تووشبوون ب ڤێ نەخۆشیێ ل هەرێما کوردستانێ ب گشتی، فشارەک مەزن کەفتییە سەر وان سەنتەران، لێ ڤەکرنا ڤی سەنتەری ل دهۆکێ دێ پێدڤیاتیێن توشبویێن پەنجەشێرێ یین سەنتەرێ پارێزگەها دهۆک و دەوروبەران و دبیت یێن ژدەرڤەی پاریزگەهێ ژی دابین بکەت، ب گونجایترین بها وزویترین دەم”.

ل هەرێما کوردستانێ 3 سەنتەرێن چارەسەرییا نەخۆشییا پەنجەشێرێ هەنە 2 ژوان سەنتەران ل پارێزگەها هەولێرێ نە و 1 ژی ل پارێزگەها سلێمانیێ یە، ئانکو ئەڤە دبیتە چوارەمین سەنتەرێ چارەسەرییا پەنجەشێرێ ل سەر ئاستێ هەرێما کوردستانێ.

حکومەتا هەرێما کوردستانێ کوژمێ 16 ملیار و 325 ملیون دینارێن عیراقی ژبۆ ڤی پرۆژەی تەرخانکرینە کو دێ ل سەر رووبەرێ ٢ ملیار و 850 مەترێن چوارگوشە هێتە ئاڤاکرن و بریارە دماوێ ٥٠٠ رۆژان دا بهێتە ب دویماهیک ئینان، کو دێ ژلایێ کومپانیا ئیگل کراون هێتە جێبەجێکرن و ئێکەم جارە ب خزمەتەک نوی دهێتە دابینکرن، ئەو ژی چارەسەرکرنا ب تیشکێ یە (LINAC Radiation).

ل جیهانێ ب گشتی نێزیک ١٠٠ جورێن نەخۆشییا پەنجەشێرێ هەنە و ل پارێزگەها دهۆکێ جورێ بەربەڵاڤتر یێ پەنجەشێرێ یا سینگی یە، کو 30% ژرێژا تووشبوویان ب وی جورێ پەنجەشێرێ نەخۆشن.

ب گور ئامارێن رێڤەبەرییا گشتی یا ساخلەمییا پارێزگەها دهۆکێ ب تنێ دئەڤ ساڵە دا ساڵا (2023ێ) 700 حالەتێن نوی یێن پەنجەشێرێ ل پارێزگەها دهۆکێ هاتینە توومارکرن، و هەر ژساڵا 2010ێ و هەتا نوکە زێدەتری 10 هزار حالەتێن تووشبوون هاتینە تومارکرن.

ل هەرێما کوردستانێ، یاسایەکا تایبەت هەیە ژبۆ سندۆقا هاریکاریێ (کۆمەکێ) ژبۆ تویشبوویێن پەنجەشێرێ و ب رێکا ڤێ سندۆقێ، هەر ساڵ پتر ژ70 ملیار دیناراێن عیراقی خەرجی ب مەرەما دەرمان و ئامیر و پێدڤیێن پزیشکی بۆ نەخۆشێن پەنجەشێرێ ل هەرێما کوردستانێ دهێتە دابینکرن.

سەجا شێرزاد-دهۆک