سه‌رۆكى هه‌رێمى كوردستان پێشوازى له پارێزگارى بانكى ناوه‌ندیى عێراق كرد
ئێواره‌ى ئه‌مڕۆ پێنجشه‌ممه 2023/10/19 به‌ڕێز نێچیرڤان بارزانى، سه‌رۆكى هه‌رێمى كوردستان له دیدارێكدا له‌گه‌ڵ به‌ڕێز عه‌لى موحسین ئه‌لعه‌للاق پارێزگارى بانكى ناوه‌ندیى عێراق، ده‌رباره‌ى دۆخى داراییى عێراق، به‌هاى دینارى عێراقى، هه‌وڵه‌كانى بانكى ناوه‌ندى بۆ سه‌قامگیریى دارایى و ئابوورى و ده‌رفه‌ته‌كانى وه‌به‌رهێنان له عێراق، بیروڕایان گۆڕییه‌وه.
سه‌رۆك نێچیرڤان بارزانى پێزانینى خۆى بۆ هه‌وڵه‌كانى بانكى ناوه‌ندیى عێراق ده‌ربڕى له ڕووبه‌ڕووبوونه‌وه‌ى ئاڵنگارییه‌كان و ڕاگرتنى به‌هاى دینار، هه‌روه‌ها ئاماژه‌ى به كاره له‌پێشینه‌كانى بانكى ناوه‌ندى كرد بۆ چۆنیه‌تیى مامه‌ڵه‌كردن له‌گه‌ڵ ئاڵنگارییه‌كاندا و چاره‌سه‌ركردنى كێشه‌كانى نه‌ختینه و دارایى.
هه‌ردوولا جه‌ختیان له گرنگیى هاریكارى و هه‌ماهه‌نگیى بانكه‌كان له عێراق و هه‌رێمى كوردستان له‌گه‌ڵ بانكى ناوه‌ندیى عێراق كرده‌وه و چه‌ند پرسێكى دیكه‌ى جێى بایه‌خى هاوبه‌شیان تاوتوێ كرد.
