ژبۆ پاراستنا ژینگه‌هى، بۆ ئێكه‌م جار ترومبێلێن ژینگه دوست كه‌فتنه بازارێن دهۆك
بلندبوونا رێژه‌یا مرۆڤان، و سوتنا ده‌هان ژێده‌رێن سوته‌مه‌نیێ, و بلند بوونا ژماره‌یا ترومبێل و كارگه‌ه و ئامیرێن كاره‌بایی, و كێم بوونا رێژه‌یا كه‌سكاتیێ ل جیهانێ هه‌میێ بووینه ئه‌گه‌رێن سه‌ره‌كى یێن په‌یداكرنا ژینگه‌هه‌كا نه ساخله‌م و ئه‌ڤ چه‌نده ژى بووینه ئه‌گه‌رێ داهێنانا جوره‌كێ نوى یێ ترومبێلان ل جیهانێ ئه‌و ژى (ترومبێلێن ژینگه دوست).
دهۆك ئێكه‌م باژێر نینه ل جیهانێ ترومبێلا ژینگه دوست لێ هاتى نمایشكرن, لێ ل سه‌ر ئاستێ هه‌رێما كوردستانێ و عیراقێ ئێكه‌م باژێره ترومبێل لێ دهێته دیتن, كو ترومبێل نه پێدڤى ب پانزین و كازوایلێ دبیت، و نه ژى روین گهورینێ, و نوكه خواسته‌كا مه‌زن یا خه‌لكێ ل هه‌مى ل جیهانێ ل سه‌ر كرینا وێ هه‌یه و دنوكه دا ئه‌ڤ جوره ترومبێل بازارێن ئه‌وروپا و چینێ و هه‌رێما كوردستانێ دهێنه فروتن.
ترومبێل ژلایێ كومپانیا نه‌هج ئه‌لعیراق ڤه ئێكه‌م جار هاتییه نمایشكرن, و ره‌ئفه‌ت زرارى به‌رپرسێ بازارگێرییا كومپانییا نه‌هج ئه‌لعیراق تایبه‌تمه‌ندیێن وێ ترومبێلێ دیاردكرت:"ئورا, ترومبێله‌كا نوى یه و ئێكه‌م جاره ل سه‌ر ئاستێ عیراقێ و هه‌رێما كوردستانێ ل دهۆكێ دهێته نمایشكرن, و ترومبێله‌كا ژینگه دوسته و پێدڤى ب سوته‌مه‌نیان نینه ژبۆ كاركرنێ, و هه‌تا راده‌یه‌ك باش دێ فشارا ل سه‌ر ژینگه‌هێ كێم كه‌ت".
هه‌ر ترومبیله‌كا ژڤى جورى بهێته كرین كێبله‌كێ شه‌حنێ (charging cable) دگه‌ل دا هه‌یه شوفیر یان خودانێ ترومبێلێ دشێت ل سه‌ر هه‌ر پلاكه‌كێ ناڤ ماڵێ ترومبێلا خۆ چارج بكه‌ت هه‌ر وه‌سا دوو جورێن چارجینگێ دگه‌ل دا هه‌نه شوفێر دشێت ب ده‌ست خۆڤه بینیت یا ئێكێ, لو چارچینگ (low charging) كو پرۆسا شه‌حنكرنا ترومبێلێ تێدا دبیت هه‌تا 8 ده‌مژمێران درێژبیت و یا دویێ ژى فاست چارچینگ (fast charging) كو دبیت پرۆسا شه‌حنكرنا ترومبێلێ كێمتر ژ4 ده‌مژمێران درێژبیت, و هه‌ر جاره‌كا ترومبێل ب ته‌مامى بهێته شه‌حن كرن (full charge) بیت شوفێر دێ شێت 350 هه‌تا 400 كیلومه‌تران ئانكو وه‌كى ترومبێلێن دى پێ بچیت.
تایبه‌تمه‌ندیێن ترومبێلا ئورا یا ژینگه‌ه دوست:
1- ژلایێ ده‌روونى ڤه مێشكێ شوفێران دێ ئارامبیت و شوفێر دێ ژئاریشێن پانزینێ دویربن.
2- سیسته‌مه‌كێ ته‌كنولوجى یێ پێشكه‌فتى تێدا هه‌یه ب شێوه‌یه‌كێ شوفێر دشێت پترییا داخوازییێن خۆ ب شێوێ ده‌نگ و ئاخفتنێ ژترومبێلێ بخوازیت.
3- سیسته‌مێ (safety) پاراستنا ساخله‌مییا شوفێرى تێدا هه‌یه.
4- بریكارێن فه‌رمى یێن ڤان ترومبێلان دشێن هاریكاربن دچاره‌كرنا هه‌ر ئاریشه‌یه‌كێ بهێته پێش شوفێران.
5- سیسته‌مێ گره‌نتیێ دگه‌ل دا هه‌یه بۆ 8 ساڵان.
6- ژپێنج ره‌نگان پێكدهێت (ره‌ش, سور, سپى, كه‌سك, ئاسمانى).
براندا ئورا وه‌كو كومپانیه‌كا سه‌ربه‌خۆیه و بۆ كومپانیا دایك گرێت وورلد موتورز ڤه‌دگه‌ریت, و ل پاشه‌رۆژێ چه‌ندین مودێلێن دى هه‌ر ژڤى براندى و ژڤان جوره ترومبێلان دێ هێنه پێشاندان, و دنوكه دا 7 ترومبێل وه‌كو تێست هاتینه ئینان و هه‌ر ل هه‌رێما كوردستانێ و هه‌تا به‌سرایێ ژى ب ته‌مامى هاتینه تێست كرن بۆ هندێ ترومبێل خۆ ل به سه‌رما و گه‌رمى و رێیێن عیراقێ و هه‌رێمێ بگریت.
ل پارێزگه‌ها دهۆكێ نێزیك 235 هزار ترومبێلان هه‌نه ژجورێ نورمال كو ب سوته‌مه‌نیان كار دكه‌ن ژبلى وان ترومبێلێن رێڤینگ و گه‌شتیاران یێن ژماره (أربیل, نینوى, سلیمانیه, كركوك, صلاح الدین, فحص موقت, ژماره‌یێن ترومبێلێن ئه‌وروپى) كو رۆژانه ل پارێزگه‌ها دهۆكێ هاتن و چوونێ دكه‌ن.
سه‌جا شێرزاد-دهۆك
