ل دهۆك، 21 مین ل زه‌ڤییه‌كا سه‌رده‌مێ رژێما به‌عس هاتینه ژناڤ برن
__2023_10_09_h19m51s52__HK.jpg)
ئه‌ڤرۆ ل سنورێ ناوچه‌دارییا زاویته (17 كیلومه‌تران نێزیك دهۆك) سه‌ر ب پارێزگه‌ها دهۆكێ ڤه تیمێن رێڤه‌به‌رییا مین و ته‌قه‌مه‌نییان ل پارێزگه‌ها دهۆكێ كار ل سه‌ر پاقژكرنا زه‌ڤییه‌كا مین رێژ كرییه كو بتنێ دئه‌ڤرۆ دا 21 مین تێدا هاتینه ژناڤ برن.
رێگر بێسفكى, رێڤه‌به‌رێ راگه‌هاندنا رێڤه‌به‌رییا مین و ته‌قه‌مه‌نییان ل پارێزگه‌ها دهۆكێ بۆ مالپه‌رێ فه‌رمى یێ پارتى دیموكراتى كوردستان:"بۆ جارا دووێیه تیمێن مه ل گه‌لیێ زاویته ده‌ست ب پاقژكرنا ڤێ زه‌ڤییا مین رێژ كرینه و ژماره‌یه‌ك مین و ته‌قه‌مه‌نییان لێ ماینه و به‌رده‌وام دێ ل سه‌ر كار كه‌ین هه‌تا كو ئه‌و زه‌ڤى 100% ژته‌قه‌مه‌نییان بهێته پاقژكرن."
زه‌ڤى بۆ سه‌رده‌مێ رژێما به‌عس ڤه‌دگه‌ریت و رووبه‌رێ وێ پتر ژ119 هزار میترێن دوو جانه, و هه‌تا نوكه 55 هزار میترێن دوو جار ژێ هاتینه پاقژكرن, و دجارا ئێكێ دا ب تنێ 10 مین هاتبوونه ژناڤبرن لێ دگه‌ل ڤان 21 مینان دێ بنه 31 مینێن ژناڤبرى, كو رێژا پاقژكرنێ دوێ زه‌ڤیێ دا ب هندێ دگه‌هیته 46%.
ب گور گوتنا رێڤه‌به‌رییا مین و ته‌قه‌مه‌نییان, هه‌ر ده‌ما كار ل سه‌ر زه‌ڤییه‌كا مین رێژ ب دویماهیك دهێت, زه‌ڤییه‌كا دى ژبۆ پاقژكرنێ دهێته هه‌لبژارتن, ئه‌و ژى ل دویف هنده‌ك پیڤه‌ران بۆ نموونه (زه‌ڤى بۆ ده‌مه‌كێ دریژ هاتبیته چولكرن و بۆ مه‌ره‌مێن كشت و كالی و ته‌رش و ته‌والی نه هاتبیته بكار ئینان, هه‌روه‌سا ل دویف شاره‌زاییا خه‌لكێ گوندى دهێته هه‌لبژارتن كو ئه‌وان زانیاریێن پشت راستكرى هه‌نه ژبۆ هه‌بوونا مین و ته‌قه‌مه‌نییان دیسان دبیت رویدان دوان زه‌ڤیان دا هاتبنه كرن).
رێژه وئامارێن راكرن و ژناڤبرنا مین و ته‌قه‌مه‌نییان ژساڵ بۆ ساڵێ جودانه, لێ ب تنێ دئه‌ڤ ساڵه دا و هه‌ر ژمێژوویا 1ى هه‌یڤا 1 ل ساڵا 2023ێ و هه‌تا ئه‌ڤرۆ پترى 1 هزار و 500 پارچه ژمین و ته‌قه‌مه‌نى و گوله و توپ و هاون و ئارپیچى و نارنجوكان هاتینه راكرن و ژناڤبرن.
ل سنورێ پارێزگه‌ها دهۆكێ 773 زه‌ڤیێن مین رێژ هه‌نه, 368 زه‌ڤى ژوانا هاتینه پاقژكرن, و 405 زه‌ڤى ژوان ماینه, و رێژا هه‌ره مه‌زن یا مین و ته‌قه‌مه‌نییا ل سنوورێ قه‌زا ئامێدیێ دهێنه دیتن چونكه به‌رده‌وام ژلایێ چه‌كدارێن په‌كه‌كێ و فروكێن توركیا دهێنه پیس كرن, لێ ب گشتى 40.40% زه‌ڤیێن پارێزگه‌ها دهۆكێ هاتینه پاقژكرن.
تیمێ راكرن و ژناڤبرنا مین و ته‌قه‌مه‌نییان ژ8 مین لابه‌ر و 2 سه‌رپه‌رشت و 1 سه‌رووك تیم و 1 هاریكارێ نوژدارى دگه‌ل 2 شوفێران پێكدهێت, و ب گور گوتنا "رێگرى", ژبه‌ر قه‌یرانێن داریی یێن ب سه‌ر هه‌رێما كوردستانێ ڤه ده‌ربازدبن هه‌تا راده‌یه‌كێ تیمێن رێڤه‌به‌رییا مین و ته‌قه‌مه‌نییان كێمن و ئاڵاڤێن هاتن و چوونێ و ترومبێل ژكاركه‌فتینه لێ ب هاریكارییا پارێزگه‌ها دهۆكێ دگه‌ل رێكخراوه‌كا بیانى ئه‌و دشێن وه‌كو رێڤه‌به‌رى كارێ خۆ به‌رده‌وام ئه‌نجام بده‌ن.
چه‌ندین تیمێن رێڤه‌به‌ریێ دنوكه دا ل چه‌ندین جهێن پارێزگه‌ها دهۆكێ كار دكه‌ن, كو تیمه‌ك ژوان ل ناوچه‌دارییا زاویته و ئێك ل ناوچه‌دارییا مانگێشكێ و ئێك ل ده‌ڤه‌ردارییا ئامێدیێ و ئێك ژى سنورێ ئیدارا سه‌ربه‌خۆ یا زاخۆ كارێ خۆ ئه‌نجام دده‌ن.
سه‌جا شێرزاد-دهۆك
