"پترى 180 پرۆژه‌یان ل زاخۆ هاتینه بجه ئینان"
كاروانێ گرنگیدان ب هه‌مى سێكته‌رێن ژیانێ ل زاخۆ به‌رده‌وامه, هه‌تا كو ب تنێ ب ده‌ربازبوونا 2 ساڵان ل سه‌ر سه‌ربه‌خۆبوونا ئیداره‌یا زاخۆ، 180 پرۆژه‌یێن خزمه‌ت گوزارى ل سه‌رانسه‌ر ئیداره‌یا سه‌ربه‌خۆ یا زاخۆ هاتینه بجه ئینان.
ل رێكه‌فتى 20ى هه‌یڤا 9 ساڵا 2021ێ و ب بریاره‌كا فه‌رمى ژلایێ ئه‌نجومه‌نێ وه‌زیران و كابینه‌یا نه‌هێ یا حكومه‌تا هه‌رێما كوردستانێ ب سه‌روكاتییا مه‌سرور بارزانى، سوزا سه‌روك مه‌سعود بارزانى دگه‌ل زاخۆیان هاتییه بجه ئینان و بریارا سه‌ربه‌خۆبوونا ئیداره‌یا زاخۆ ژێر رێوه‌رسمێن تایبه‌ت ل زاخۆ هاتییه دان. هه‌ر ژوێ رۆژێ و هه‌تا ئه‌ڤرۆ ژى ئیداره‌یا زاخۆ ب سه‌رپه‌رشتییا گۆهدار شێخۆ و ب پشته‌ڤانییه‌كا تایبه‌ت ژلایێ حكومه‌تا هه‌رێما كوردستانێ كه‌فتییه خزمه‌تا خه‌لكێ ده‌ڤه‌رێ دا, و هه‌مى ئه‌و سێكته‌رێن گرنگ یێن گرێدایی ژیانا خه‌لكێ زاخۆ, كار ل سه‌ر هاتییه كرن.
پەیڤدارێ ئیدارەیا سەربەخۆ یا زاخۆ شڤان عەبدی، تایبەت بۆ مالپەرێ فەرمی یێ پارتی دیموکراتی کوردستان ئامارێن دوو ساڵێن بوری یێن کارکرنێ ل سنوورێ ئیدارەیا سەربەخۆ یا زاخۆ دیاردکەت:
ژوان پرۆژه و سێكته‌رێن كار ل سه‌ر هاتى كرن ل سه‌رانسه‌ر ئیداره‌یا سه‌ربه‌خۆ یا زاخۆ:
كه‌رتێ په‌روه‌ردێ:
• ئاڤاكرنا 6 قۆتابخانه‌یێن نوى و سه‌رده‌مانه.
• نویژه‌نكرنا 39 قۆتابخانه‌یێن كه‌ڤن.
كه‌رتێ ساخله‌مى:
• نویژه‌نكرنا نه‌خۆشخانه‌یا هه‌وارهاتنا زاخۆ ب باشترین شێواز.
• نویژه‌نكرنا 9 بنگه‌هێن ته‌ندروستى ب باشترین شێواز.
• ئاڤاكرنا نه‌خۆشخانه‌یه‌ك پێشكه‌فتى ل قه‌زا باتیفا. • ئاڤاكرنا ئێكه‌مین نه‌خۆشخانه‌یا زارووكان ب شێوازه‌ك پێشكه‌فتى ل قه‌زا زاخۆ.
• ئاڤاكرنا بنگه‌هه‌ك ته‌ندروستى ل تاخه‌ك مللى ل قه‌زا زاخۆ.
• دابینكرنا كه‌ل و په‌ل و ئامیرێن پزیشكى یێن پێشكه‌فتى و ئامبولانسان بۆ نه‌خۆشخانه و بنگه‌هێن ته‌ندروستى.
كه‌رتێ باژێرڤانى و رێك و بانان و ئاڤێ:
• پترى 150 كیلومه‌تران رێیێن سه‌ره‌كى و ناڤخوى و گه‌ره‌ك و تاخان هاتینه قیركرن.
• چێكرنا پترى 86 سولین و ئاڤرێژان.
كه‌رتێ گه‌شت و گوزارێ:
• دروستكرنا پرۆژێ كورنیشێ پرا ده‌لال ب درێژییا خابیرێ زاخۆ.
• دروستكرنا 5 سكرێن نقوم دناڤا خابیرێ زاخۆ دا.
• نویژه‌نكرنا بازارێ كه‌ڤنێ زاخۆ ب شێوازه‌ك كه‌لتورى.
• نویژه‌نكرنا قشلا زاخۆ ب شێوازه‌ك كه‌لتورى.
• رێك و پێك كرن و نویژه‌نكرنا چه‌ندین جهێن سرۆشتى یێن گه‌شتیارى.
زێده‌بارى ڤان پرۆژه‌یێن دیار, چه‌ندین خزمه‌ت گوزاریێن جودا جودا دكه‌رتێن جودا دا, وه‌كى كه‌رتێن ره‌وشه‌نبیرى و هونه‌رى و بوارێ خواندنا بلند و وه‌رزش و لاوان دا هاتینه جێبه‌جێكرن.
و ژبۆ بجه ئینانا وان پرۆژه‌یان, پترى 200 ملیار دینارێن عیراقى ل سه‌ر ئه‌رکێ حكومه‌تا هه‌رێما كوردستانێ هاتینه مه‌زاختن.
ئیداره‌یا سه‌ربه‌خۆ یا زاخۆ ژدوو قه‌زایان (زاخۆ و باتیفا) دگه‌ل سێ ناحییان (رزگارى, بێگوڤا و ده‌ركارێ) پێك دهێت, هه‌روه‌سا 193 گۆندان بخۆڤه گرێ ددده‌ت كو 77 گۆند سه‌ر ب قه‌زا باتیفانه و 116 گۆند ژى سه‌ر ب قه‌زا زاخۆنه.
زاخۆ باژێره‌ك هه‌رى گرنگێ ستراتیجى و گه‌شتیارى و بازرگانى یێ هه‌رێما كوردستانێ و عیراقێ و جیهانێ یه, و دویماهیك خالا سنورى یا بكورى یه كو هه‌رێما كوردستانێ ب هه‌ردوو وه‌ڵاتین توركیا و سوریا ڤه گرێ دده‌ت، و گرنگترین ده‌روازه‌یێ سنوورى یێ فه‌رمى (ئیبراهیم خه‌لیل) لێ هه‌یه و ده‌ریایێ خابوور ژوه‌لاتێ توركیا تێدا ده‌رباز دبیت.
هه‌روه‌سا زاخۆ ب 440 مه‌تران ل سه‌ر ئاستێ ده‌ریای بلنده و په‌حناتییا وێ دگه‌هیته 1521,51 كیلومترێن دووجا و ب شێوه‌یه‌ك گشتى 337 هزار و 900 كه‌س ژخه‌لكێ زاخۆ و ئاواره و په‌نابه‌ران لێ نیشته‌جێ نه.
سه‌جا شێرزاد-دهۆك
