20 هەتا 150 ملیون دیناران، هاووڵاتیێ هەرێما كوردستانێ دشێت ب قەرز وەربگریت
وەكو پالپشتییەكا دارایی بۆ هاووڵاتییان و ب هێزكرنا سیستەمێ بانكی و دارایی و كەرتێ تایبەت ل هەرێما كوردستانێ بڕیارە 20 هەتا 150 ملیۆن دینارێن عیراقێ ب خۆدان پرۆژەیێن تایبەت ل پارێزگەهێن هەرێمێ بهێتە دان.
د رێوەرسمەكێ تایبەت دا و ب ئامادەبوونا سەروكێ حكومەتا هەرێما كوردستانێ مەسرور بارزانی ل هەولێرا پایتەخت، پرۆژێ گەشانەوە یێ پالپشتییا دارایی و دانا قەرزێن بچووك ژبۆ بزنسێن بچووك و ناڤنجی راگەهاند و گوهدار عەبدوللا یوسف رێڤەبەرێ قەرزێن بچووك ل پارێزگەها دهۆك دبێژیت: هەمی هاوولاتیێن هەرێما كوردستانێ دشێن مفایی ژڤی پرۆژەی وەربگرن و پشتی ئەڤ پرۆژە هاتیە راگەهاندن رۆژانە خەلك پەیوەندیێ ب مە دكەن ژبۆ وەرگرتنا زانیارییان.
مەرجێن سەرەكی یێن پێدانا قەرزی ئەوە:
1- داواكار هاوولاتیێ هەرێما كوردستانێ بیت.
2- داواكار ل هەرێما كوردستانێ نێشتەجێ بیت.
3- تەمەنێ داواكاری دناڤ بەرا 21 ساڵ هەتا 60 ساڵان بیت.
4- داواكار یان خۆدان پرۆژە فەرمانبەر نەبیت.
5- ساڵەك ل سەر توماركرنا پرۆژەیێ وی ل رێڤەبەرییا كومپانییان دەرباز ببیت.
پرۆژە ژدەسپێشخەرییا حكومەتا هەرێما كوردستانێ ب هەماهەنگی دگەل بەنكا جیهان و رێكخراوا كارساز هاتییە ئەنجامدان، و رێڤەبەریێن قەرزێن بچووك دێ وەكو ناڤەندەكێ بن دناڤبەرا رێكخراوێ و خەلكێ دا، كو هەمی ئەو داخوازیێن ژلایێ خۆدانێن پرۆژەییان(داواكاران) دهێنە كرن دێ ژلایێ وان رێڤەبەرییان ڤە هێنە وردبینی كرن پاشان بریار دێ ل سەر هێتە دان كو بۆ رێكخراوێ بهێتە هنارتن.
تایبەتمەندیێن پرۆژەیێ گەشانەوە:
1- پرۆژە دێ مامەلێ دگەل پرۆژە و بزنسێن بچووك و ناڤنجی كەت.
2- هاندانا بانكێن تایبەت ژبۆ كاركرنێ دبوارێ پێ دانا قەرزان دا.
3- ئاشنابوونا بزنسكاران ل سەر چەوانییا قەرز كرنێ.
4- پشتەڤانییا تەكنیكی ژبۆ پرۆژەیان پێشكێش دكەت.
5- دابینكرنا راوێژكارێن بیانی و ناڤخویی.
6- باوەریێ ب بانكێن تایبەت بهێز دكەت.
تایبەتمەندیێن قەرزان:
1- ئێكەم جار داواكار دێ ب رێیا ئۆنلاین دناڤا لینكەكێ تایبەتدا قەرزی داخواز كەت.
2- قەرز دێ ژ20 ملیۆن دینارێن عیراقی دەستپێكەت هەتا 150 ملیۆن دینارێن عیراقی.
3- ل هەرێما كوردستانێ ب تنێ 25 پرۆژە دێ هێنە وەرگرتن ژبۆ پێدانا قەرزان.
4- ل سەر 36 هەیڤان قەرز دێ ژبۆ بانكان هێنە زڤراندن.
5- قەرز دێ ل سەر بنەمایێن بانكا ئیسلامی هێنە دان.
6- ژبۆ داخوازكرنێ بارمتە (رەهینە) ژداواكاری ناهێتە خواستن.
پرۆژە ل 25ی هەیڤا 9 هاتە راگەهاندن، د بیرەوەرییا شەش ساڵی یا ریفراندومێ دا، كو مەسرور بارزانی سەروكێ حكومەتا هەرێما كوردستانێ پرۆژە راگەهاندییە و دگوتارا خۆ دا گوت: "خۆشحالم ژبۆ راگەهاندنا پرۆژەیێ گەشانەوە یێ پێدانا قەرزێن بازرگانی بۆ بزنسێن بچووك و ناڤنجی ب رێیا بانكێن تایبەت، كو ئەڤ پرۆژە بەشەكە ژكارناما حكومەتا هەرێما كوردستانێ ژبۆ گەشەپێدانا كەرتێ تایبەت، كو ل سالێن بوری دا هەردووك كەرتێن تایبەت و گشتی هەماهەنگ بوون و تەمامكەرێن ئێك بوون ژبۆ پێشڤەبرنا ژێرخانەیا ئابووری یا هەرێما كوردستانێ"
ب گشتی ل دهۆكێ 90 هزار پرۆژە یێن تایبەت هەنە، و ل وان پرۆژەیان 130 هزار كرێكار كار دكەن و 20 هەتا 25% ژوان كرێكاران بیانی نە.
و ل گور سەندیكا كرێكارێن هەرێما كوردستانێ لقا دهۆك، رێژا بێ كاریی ل پارێزگەها دهۆكێ گەهشتییە 14% لێ ئەڤ پرۆژەیێ پێدانا قەرزان دێ هاریكاربیت كو رێژا بێ كاریێ ل هەرێما كوردستانێ ب گشتی كێم ببیت.
سەجا شێرزاد-دهۆك
