"نێزیكى 1 ملیون و 900 هزار گه‌شتیاران سه‌ره‌دانا پارێزگەھا دھۆکی کرییە"
ل پارێزگه‌ها دهۆكێ ژده‌سپێكا ساڵا 2023ێ, و هه‌ر ژمێژوویا 1ى هه‌یڤا 1 هه‌تا 31ى هه‌یڤا 8, نێزیكى 1 ملیون و 900 هزار گه‌شتیاران سه‌ره‌دانا پارێزگه‌ها دهۆكێ كرییه, و به‌هرا پتر یا وان گه‌شتیاران خه‌لكێ موسل و ناڤه‌راست و باشوورێ عیراقێ بوون, و رێژا ماییى یا گه‌شتیاران ژى ژده‌رڤه‌ى هه‌رێما كوردستانێ و عیراقێ سه‌ره‌دانێ دكه‌ن هه‌ر ژباكور و رۆئاڤایێ كوردستانێ و وه‌ڵاتێن ده‌وروبه‌ر, و به‌رده‌وام بزاڤ ژلایێ رێڤه‌به‌رییا گه‌شتیارى یا پارێزگه‌ها دهۆكێ دهێته كرن كو رێژه‌یا هاتنا گه‌شتیارێن بیانى بۆ پارێزگه‌ها دهۆكێ ساڵانه به‌ره‌ف زێده‌تر بچیت.
ساڵانه وتایبه‌ت ل هه‌شت هه‌یڤێن ده‌سپێكى یێن ساڵێ و هه‌یڤا 12ژى, گه‌شتیار ب رێژه‌یه‌كا گه‌له‌ك باش سه‌ره‌دانا هه‌رێما كوردستانێ و پارێزگه‌هێن وێ دكه‌ن ژبه‌ر كو وه‌رزێن بهار و هاڤینانه و سه‌قامگیری و ئارامییا ره‌وشا وێ یا ئێمناهى و هوایێ وێ یێ فێنك و وهه‌بوونا دیمه‌نێن سروشتى و جوان دبیته جهێ سه‌رنج راكێشانا خه‌لكێ بیانى.
دچاڤپێكه‌فتنه‌كێ دگه‌ل رێوار مزیرى, رێڤه‌به‌رێ راگه‌هاندنا رێڤه‌به‌رییا گشتى یا گه‌شت و گوزارێ ل پارێزگه‌ها دهۆكێ دبێژیت: "ساڵانه رێژه‌یه‌كا هه‌ره باش یا گه‌شتیاران سه‌ره‌دانا پارێزگه‌ها دهۆكێ ب گشتى دكه‌ن و به‌رده‌وام گه‌شت و گوزارا دهۆكێ هه‌وڵ دده‌ت ئه‌و رێژه ساڵ بۆ ساڵێ باشتر لێ بهێت و خزمه‌ت گوزاریا گه‌شت و گوزارێ ل سه‌رانسه‌ر پارێزگه‌ها دهۆكێ پێشڤه بچیت و دئه‌ڤ ساڵه‌دا رێژه‌یا هه‌ره باش یا گه‌شتیاران سه‌ره‌دانا پارێزگه‌ها دهۆكێ كرییه".
ل پارێزگه‌ها دهۆكێ ژده‌سپێكا ساڵا 2023ێ, و هه‌ر ژمێژوویا 1ى هه‌یڤا 1 هه‌تا 31ى هه‌یڤا 8, نێزیكى 1 ملیون و 900 هزار گه‌شتیاران سه‌ره‌دانا پارێزگه‌ها دهۆكێ كرییه, و به‌هرا پتر یا وان گه‌شتیاران خه‌لكێ موسل و ناڤه‌راست و باشوورێ عیراقێ بوون, و رێژا ماییى یا گه‌شتیاران ژى ژده‌رڤه‌ى هه‌رێما كوردستانێ و عیراقێ سه‌ره‌دانێ دكه‌ن هه‌ر ژباكور و رۆئاڤایێ كوردستانێ و وه‌ڵاتێن ده‌وروبه‌ر, و به‌رده‌وام بزاڤ ژلایێ رێڤه‌به‌رییا گه‌شتیارى یا پارێزگه‌ها دهۆكێ دهێته كرن كو رێژه‌یا هاتنا گه‌شتیارێن بیانى بۆ پارێزگه‌ها دهۆكێ ساڵانه به‌ره‌ف زێده‌تر بچیت.
رێوار مزیرى دووپات دكه‌ت كو به‌رده‌وام حكومه‌تا هه‌رێما كوردستانێ و تایبه‌تى كابینه‌یا نه‌هێ یا حكومه‌تا هه‌رێما كوردستانێ هه‌مى ئاسانكارییان ژبۆ وه‌به‌رهێنه‌ر و خۆدان كاران دچارچوڤێ یاسایێ دا دكه‌ت, بۆ هندێ رێژه‌یا كارى زێده ببیت و كه‌رتێ گه‌شتیارى ل هه‌رێما كوردستانێ و تایبه‌ت ل پارێزگه‌ها دهۆكێ خورت ببیت, ژله‌وما ژى ساڵانه رێژه‌یه‌كا بلند یا بنگه‌هێن گه‌شتیارى ب بێ جوداهى ل سه‌رانسه‌ر پارێزگه‌ها دهۆكێ زێده دبن هه‌تا كو ل پارێزگه‌ها دهۆكێ دنوكه دا 900 بنگه‌هێن گه‌شتیارى یێن موله‌تدایی و 250 هاڤینگه‌هێن سرۆشتى هه‌نه و ب تنێ دئه‌ڤ ساڵه دا 42 بنگه‌هێن نوى یێن گه‌شتیارى هه‌تا هه‌یڤا 7 یا بورى ل دهۆكێ هاتینه ڤه‌كرن, دهه‌مان ده‌م دا رێژه‌یه‌كا دى ژى یا بنگه‌هێن گه‌شتیارى دوارێ جێبه‌جێكرنێ دانه.
ژلایێ حه‌واندنا گه‌شتیاران ژى رێڤه‌به‌رییا گشتى یا گه‌شت و گوزارێ ل پارێزگه‌ها دهۆكێ به‌رده‌وام پلانێن باش ددانیت ژبۆ پێشوازى و حه‌واندنا گه‌شتیاران ب باشترین شێوه, و ژوان خزمه‌تێن دهێنه پێشكێشكرن, تیمێن گه‌شتیارى به‌رده‌وام سه‌ره‌دانا بنگه‌هێن گه‌شتیارى یێن پارێزگه‌ها دهۆكێ دكه‌ن بۆ هندێ بجه ئینانا رێنمایێن ساخله‌مى و ئێمناهى دووپات بكه‌ت و ل هه‌لكه‌فتان ژى تیمێن گه‌شتیارى پێشوازییا گه‌شتیاران دكه‌ن و ئاڤ و شریناهى و رێبه‌ێن گه‌شتیارى ل سه‌ر گه‌شتیاران به‌ڵاڤ دكه‌ن, هه‌روه‌سا وه‌كو رێڤه‌به‌رییه‌ك گشتى هه‌ماهه‌نگى دگه‌ل هه‌مى سازیێن په‌یوه‌ندیدارێن پارێزگه‌ها دهۆكێ هه‌یه, ژوان ژى ئاسایش و ساخله‌مى و به‌ره‌ڤانییا باژێرى و كومه‌لا گه‌شتیارناسێن هه‌رێما كوردستانێ و كومه‌لا ئوتێل و خوارنگه‌هان ل پارێزگه‌ها دهۆكێ و گه‌له‌ك سازیێن دى یێن میرى, و ئه‌ڤ هه‌ماهه‌نگییه بۆ وێ چه‌ندێ یه گه‌شتیارێ دهۆكێ ب باشترین شێوه گه‌شتا خۆ ده‌رباز بكه‌ت, و ئه‌گه‌ر هات هه‌ر گه‌شتیاره‌كێ گازنده‌یه‌ك هه‌بیت دشێت ب ئاسانى بگه‌هینیت تیمێن گه‌شتیارى و ب سینگه‌كێ به‌رفره‌ه گله‌ییا وى دهێته وه‌رگرتن.
رێژه‌یا گه‌شتیارى به‌رامبه‌ر ب ساڵا 2021ێ گه‌له‌ك زێده‌بوویه, ل ده‌مه‌كێ ل ساڵا 2021ێ و ل هه‌ر 12 هه‌یڤان 1 ملیون و 500 هزار گه‌شتیاران سه‌ره‌دانا پارێزگه‌ها دهۆكێ كربوو و به‌رامبه‌ر وێ ب تنێ د8 هه‌یڤێن بورى دا نێزیك 1 ملیون و 900 هزار گه‌شتیاران سه‌ره‌دان كرییه, هه‌روه‌سا ل ساڵا 2022ێ, ل هه‌ر 12 هه‌یڤان 2 ملیون و 500 هزار گه‌شتیاران سه‌ره‌دانا پارێزگه‌ها دهۆكێ كربوو.
پارێزگه‌ها دهۆكێ ژپشتى سه‌رهلدانێ 7 قه‌زا دگەل ئیدارا سەربەخۆ یا زاخۆ و 24 ناحی و پترى 914 گوندێن ئاڤا ب خۆڤه گرێ دده‌ت, و دنوكه دا زێده‌ترى 110 ئوتێل و موتێل و شوقه‌یێن رائێخستى یێن گه‌شتیارى لێ هه‌نه, ئانكو دئێك شه‌ڤ دا پارێزگه‌ها دهۆكێ شیانێن ڤه‌حه‌وادنا زێده‌ترى 16 هزار گه‌شتیاران هه‌یه, و ئه‌گه‌ر هات و رێژه‌یا گه‌شتیاران دئێك شه‌ڤ دا زێده‌تر لێهات رێڤه‌به‌رییا گشتى یا گه‌شت و گوزارێ جهێن یه‌ده‌ك هه‌نه, ئانكو هه‌ر گه‌شتیاره‌ك سه‌ره‌دانا پارێزگه‌ها دهۆكێ بكه‌ت بێى جهێ حه‌واندنێ نامینیت.
دهۆك, ئه‌و باژێرێ شرینێ هه‌رێما كوردستانێ, ژپرا ده‌لال و خابیرێ زاخۆ و گه‌لیێ دهۆك و ئامێدیكا گوپیتكا چیایی و سیپه و كه‌لها ئاكرێ و گه‌له‌ك جهێن دى یێن سه‌رنج راكێش, خه‌لك ژهه‌ر چه‌ند پارچه‌یێن كوردستانێ و عیراقێ و وه‌ڵاتێن بیانى ب سه‌ره‌دانا دهۆكێ شاد دبن, ژبه‌ر پێشوازییا خه‌لكێ وێ و ئێمناهى و ئارامییا ره‌وشا وێ و سه‌قامگیرییا كه‌ش و هوایێ وێ, و ئه‌ڤ چه‌نده بوویه جهێ ڤه‌لڤینه‌كا باش یا گه‌شتیارى ل پارێزگه‌ها دهۆكێ
سه‌جا شێرزاد-دهۆك
