سەرۆكی هەرێمی كوردستان لەگەڵ وەزیری دەرەوەی نەمسا كۆبووەوە
ھەولێر-KDP.info- نێچیرڤان بارزانی سەرۆكی هەرێمی كوردستان لەگەڵ وەزیری دەرەوەی نەمسا كۆبووەوە، پێوەندییەكانی نەمسا لەگەڵ عێراق و هەرێمی كوردستان، پێوەندییەكانی هەولێر ـ بەغدا، كۆچی نایاسایی بۆ ئەوروپا و دواین پێشهاتەكانی ناوچەكە بەگشتی، تاوتوێ كران.
ئەمڕۆ چوارشەممه 13ـی ئەیلوول، نێچیرڤان بارزانی سەرۆكی هەرێمی كوردستان، پێشوازی لە ئەلێكساندەر شۆڵنبێرگ وەزیری دەرەوەی نەمسا و شاندێكی یاوەری كرد.
لە كۆبوونەوەیەكدا جێگرانی سەرۆك و بەرپرسی فەرمانگەی پێوەندییەكانی دەرەوەی هەرێمی كوردستان و نوێنەری حكوومەتی هەرێمی كوردستان لە نەمسا ئامادەی بوون، پێوەندییەكانی نەمسا لەگەڵ عێراق و هەرێمی كوردستان، پێوەندییەكانی هەولێر ـ بەغدا، كۆچی نایاسایی بۆ ئەوروپا و دواین پێشهاتەكانی ناوچەكە بەگشتی، تاوتوێ كران.
نێچیرڤان بارزانی وێڕای ئاماژەدان بە پێوەندیی لەمێژینەی هەردوولا و ستایشی پشتگیریی نەمسا لە هەرێمی كوردستان و بەردەوامیی گەشتیی ڕاستەوخۆی ئاسمانیی ڤیەننا ـ هەولێر، پیرۆزبایی و دەستخۆشی لە وەزیری دەرەوەی نەمسا كرد بۆ دووبارەكردنەوەی باڵوێزخانەی وڵاتەكەیان لە بەغدا، داوای كرد نوێنەرایەتییەك لە هەرێمی كوردستان بكەنەوە، هەروەها ئامادەیی هەرێمی كوردستانی بۆ برەودان بە پێوەندییەكانی لەگەڵ نەمسا لە هەموو بوارەكاندا دووپات كردەوە.
لای خۆیەوە وەزیری دەرەوەی نەمسا دووپاتی كردەوە، وڵاتەكەی بە بایەخەوە لە پێوەندییەكانی لەگەڵ عێراق و هەرێمی كوردستان دەڕوانێت و كار بۆ ئەوە دەكەن نوێنەرایەتییەك لە هەولێر بكەنەوە، هەروەها دووپاتی لەوە كردەوە كە كەرتی تایبەتی نەمسایی خوازیارە وەبەرهێنان لە هەرێمی كوردستان بكات. لەمبارەیەوە هەردوولا هاوڕا بوون كە سەقامگیریی سیاسی و تەناهی گرنگە بۆ ڕاكێشانی سەرمایەگوزاریی بیانی و پێشكەوتنی ئابووری. لەبارەی كۆچی نایاساییش هەردوولا داكۆكییان لەوە كردەوە كە بۆ ڕووبەڕووبوونەوەی كۆچی ناسایی، دەبێ هاوئاهەنگیی هەمەلایەنە لە نێوان وڵاتانی ئەوروپا و ناوچەكەدا هەبێت.
لەبارەی كێشەكانی هەولێر ـ بەغدا، نێچیرڤان بارزانی دووپاتی كردەوە كە دەبێ كێشەكان لەسەر بنەمای دەستوور چارەسەر بكرێن و سیستمی فیدراڵی بە تەواوی جێگیر ببێت، بۆ ئەو مەبەستەش گفتوگۆیەكی بنیاتنەر لەسەر بنەمای لێكگەیشتنی هاوبەش بۆ چارەسەر و تێپەڕاندنی كێشەكان بەڕێوە بچێت. هەروەها دووپاتی لە پێوەندیی دراوسێیەتیی باش لەگەڵ وڵاتانی دراوسێ و پاراستنی بەرژەوەندیی هاوبەش كردەوە.
