سه‌رۆكى هه‌رێمى كوردستان و باڵیۆزى ئه‌مه‌ریكا كۆبوونه‌وه
پاشنیوه‌ڕۆى ئه‌مڕۆ دووشه‌ممه 2023/9/11 به‌ڕێز نێچیرڤان بارزانى، سه‌رۆكى هه‌رێمى كوردستان، پێشوازى له خاتوو ئالینا ڕۆمانۆوسكى، باڵیۆزى ئه‌مه‌ریكا له عێراق و شاندیكى یاوه‌رى كرد.
له كۆبوونه‌وه‌یه‌كدا ده‌رباره‌ى په‌یوه‌ندییه‌كانى ئه‌مه‌ریكا له‌گه‌ڵ عێراق و هه‌رێمى كوردستان، گفتوگۆى چاره‌سه‌ركردنى كێشه‌كانى هه‌ولێر ـ به‌غدا به‌تایبه‌تى پرسى بودجه و مووچه‌ى مووچه‌خۆرانى هه‌رێمى كوردستان و دۆخى عێراق و هه‌رێمى كوردستان، بیروڕایان گۆڕییه‌وه.
هه‌ردوولا جه‌ختیان له گرنگیى گفتوگۆیه‌كى بنیاتنه‌رانه له‌نێوان حكوومه‌تى فیدراڵى عێراق و حكوومه‌تى هه‌رێمى كوردستاندا كرده‌وه بۆ لێكگه‌یشتنى هاوبه‌ش و چاره‌سه‌ركردنى كێشه‌كانى نێوانیان، به شێوه‌یه‌ك مافه ده‌ستوورییه‌كانى هه‌مووان ده‌سته‌به‌ر بكات و ئارامى و سه‌قامگیریى سیاسیى وڵات بپارێزێت.
سه‌رۆك نێچیرڤان بارزانى داكۆكى له گرنگیى جێبه‌جێكردنى سیستمى فیدراڵى له عێراق كرده‌وه وه‌ك له ده‌ستووردا هاتووه، هه‌روه‌ها ئاماژه‌ى به‌وه كرد كه ده‌بێ وه‌ك هه‌رێمێكى فیدراڵى مامه‌ڵه له‌گه‌ڵ هه‌رێمى كوردستاندا بكرێت و به‌رده‌وامیى كێشه و ناكۆكی له‌نێوان حكوومه‌تى فیدراڵیى عێراق و حكوومه‌تى هه‌رێمى كوردستاندا، له به‌رژه‌وه‌ندیى وڵاتدا نییه.
هه‌ردوولا هاوڕا بوون له‌سه‌ر گرنگیى چاره‌سه‌كردنى كێشه‌كان و دابینكردنى شایسته دارایییه‌كانى هه‌رێمى كوردستان به‌پێى یاسا و ڕێككه‌وتنه‌كان، هه‌روه‌ها جه‌ختیان له ته‌بایى و یه‌كڕیزیى نێوان لایه‌نه سیاسییه‌كانى هه‌رێمى كوردستان، به‌تایبه‌تى پارتى دیموكراتى كوردستان و یه‌كێتیى نیشتمانیى كوردستان كرده‌وه.
ده‌رفه‌ته‌كانى سه‌رمایه‌گوزارى و وه‌به‌رهێنانى بیانى و ناوخۆیى و به‌هێزكردنى كه‌رتى تایبه‌ت له عێراق و هه‌رێمى كوردستان، دۆخى ئێزدییان و گرنگیى جێبه‌جێكردنى ڕێككه‌وتنى حكوومه‌تى هه‌رێمى كوردستان و حكوومه‌تى فیدراڵیى عێراق بۆ ئاساییكردنه‌وه‌ى دۆخى شه‌نگال و پێشهاته‌كانى ناوچه‌كه به‌گشتى، ته‌وه‌رێكى دیكه‌ى كۆبوونه‌وه‌كه بوو.
