نویكرنا بازارێ كه‌ڤنێ زاخۆ.. پێنگاڤه‌كا دى دپاراستنا كلتورێ كوردى دا
رۆژ بۆ رۆژێ و حكومه‌تا هه‌رێما كوردستانێ, سوزا خۆ دگه‌ل زاخۆ و زاخۆیان بجه دئینیت, ماوێ نێزیك دوو ساڵانه, و تایبه‌ت پشتى سه‌ربه‌خۆبوونا ئیداره‌یا زاخۆ, باژارێ زاخۆ دقوناغێن گه‌شێ دانه و كولتور و مێژوویا وێ یا كه‌ڤنار بۆ كوردستانى و بیانییان دهێته سه‌پاندن, و ئه‌ڤرۆ بازارێ كه‌ڤنێ زاخۆ لایه‌نه‌كێ دى یێ كلتورى بۆ خه‌لكێ دیاركر.
چیا ئه‌مین, رێڤه‌به‌رێ گه‌شت و گوزارێ ل ئیدارا سه‌ربه‌خۆیا زاخۆ, بۆ مالپه‌رێ پارتى دیموكراتى كوردستان:
"ژبه‌ركو سیكا تارى, ئه‌و بازارێ كه‌ڤنارێ زاخۆیه و مه حه‌ز كرییه ببیته جهه‌ك كلتورى, هزرا نویژه‌نكرنا بازارى هاتییه, بۆ هندێ ئه‌و ژى وه‌كو پرا ده‌لال و گه‌له‌ك جهێن دى یێن زاخۆ یێن كه‌ڤن بكه‌ڤیته خزمه‌تا گه‌شتیاران"
نویژه‌نكرنا بازارێ كه‌ڤنێ زاخۆ ل سه‌ر فه‌رمانا سه‌روكێ حكومه‌تا هه‌رێما كوردستانێ مه‌سرور بارزانى و ل ژێر چاڤدێرییا راسته‌وخو یا ئیداره‌یا سه‌ربه‌خۆ یا زاخۆ هاتییه كرن, و گوژمێ 1 ملیار و 500 ملیون دینارێن عیراقى ل پرۆژه‌ى ب هه‌ردوو قوناغێن خۆڤه هاتییه مه‌زاختن.
چییا ئه‌مین دیار دكه‌ت كو به‌رییا ده‌ست ب قوناغا نویژه‌نكرنا بازارى بهێته كرن بازار ل ژێر مه‌ترسییا هه‌رفاندنێ بوویه، لێ دنوكه دا و پشتى بازار هاتییه نوى كرن ئه‌و مه‌ترسى نه‌مایه و به‌رۆڤاژى بوویه جهێ سه‌رنجا گه‌شتیاران و خه‌لكێ زاخۆ ژى و 100% هزرا نویژه‌نكرنێ سه‌ركه‌فتن ئینایه و دهه‌مان ده‌مدا بوویه جهێ په‌یداكرنا چه‌ندین ده‌لیڤێن كارى بۆ گه‌نجێن زاخۆ.
دنوكه دا نویژه‌نكرنا بازارێ كه‌ڤنێ زاخۆ دقوناغا دویێ و یا دویماهیێ دایه, و هه‌تا 15 رۆژێن دى بازار 100% دێ ژقوناغێن كاركرنێ ب دویماهیك هێت، و تێدا دێ 194 دوكان هێنه ڤه‌كرن و هه‌تا 500 ده‌لیڤێن كارى ژى دێ لێ هێنه ته‌رخانكرن, كو رێژا 20% یا وان ده‌لیڤێن كارى و دوكانان بۆ ئافره‌تێن زاخۆ بهێته ته‌رخانكرن.
پشتى بازارێ زاخۆ یێ كه‌ڤن ب دویماهیك دهێت دێ ده‌ست ب نویژه‌نكرنا ده‌وروبه‌رێن بازارى هێته كرن كو هه‌ر ژده‌سپێكا بازارێ كه‌ڤن و ده‌ورا سالح یوسفى یا ب ناڤ و ده‌نگ ل بازارێ زاخۆ و هه‌تا قشلا زاخۆ ژى دێ هێته نویژه‌نكرن ب شێوه‌یه‌كى جهێ په‌یاده و هاتن و چوونێ و سه‌ره‌دانێ لێ هه‌بیت.
بازارێ كه‌ڤنێ زاخۆ ل ساڵێن 20ان هاتییه دروستكرن, و دبه‌رێ دا سێ ناڤێن جودا بخۆڤه دگرتن (سیكا تارى, سیكا كه‌ڤن و چارسیا زاخۆ) لێ دنوكه دا ناڤێ بازارێ كه‌ڤنێ زاخۆ ل سه‌ر مایه، و دپلان دایه لڤینا گه‌شتیارى به‌رده‌وام لێ بهێته خورتكرن و بازارێ زاخۆ بكه‌ڤیته دهه‌مى پلانێن كومپانى و گروپێن گه‌شتیارى یێن ب درێژییا ساڵێ سه‌ره‌دانا باژارێ زاخۆ دكه‌ن.
