زاخۆ.. رێژا گەشتیاران 100% بلند بوویە

زاخۆ-KDP.info- نێزیک 6 مەهانە زاخۆ بوویە ئێک ژ سەرنج راکێشترین جهێ گەشتیاریێ هەرێما کوردستانێ و عیراقێ و  پرۆژێ کورنیشێ پرا دەلال و دەوروبەرێن خابیرێ زاخۆ چوویە دپلانێن سەرەکى یێن گەشتیاران دا.

ژبۆ ئاڤەدانکرن و پێشخستنا هەرێما کوردستانێ، حکومەتا هەرێمێ بەردەوام خورت بوونا کەرتێ گەشتیارێ کرییە دئێکەم پلانێن خودا، و دئەڤ ساڵە دا کابینەیا نەهێ یا حکومەتا هەرێما کوردستانێ ب سەروکاتییا مەسرور بارزانى زاخۆ کرییە سومبولا وەرارا گەشتیارى ل هەرێمێ، لدور ڤێ چەندێ  چیا ئەمین رێڤەبەرێ گشتیێ گەشت و گوزارا ئیدارا سەربەخۆ یا زاخۆ، ئەڤێ چەندێ دووپات دکەت"دکابینەیا نەهێ یا حکومەتا هەرێما گوردستانێ دا، ژپلانێن سەرەکى ئەو بوویە باژێرێ زاخۆ ب رویەکێ نوى بهێتە پێش و ببیتە جهێ سەرنجا کوردستانى و بیانیان، و ئەڤێ چەندێ ژى ژبریارا سەربەخۆبوونا ئیدارا زاخۆ دەسپێکرییە، ژبەرکو بودجەیەکا تایبەت ژبۆ زاخۆ دهێتە تەرخانکرن، دیسان روولێ سەرەکى یێ سەرپەرشتێ ئیدارا سەربخۆ یا زاخۆ دمەزاختن و بکارئینانا وێ بودجێ دیارە"

کورنیشێ دەلال، ژقوناغێن کارکرنێ ب دویماهیک هاتییە و دمێژوویا 14ى ڤێ مەهێ ل سەر دەستێ سەروکێ حکومەتا هەرێما کوردستانێ مەسرور بارزانى هاتە ڤەکرن، لێ بەردەوام کەرستە و هزرێن جوانکرن و خەملاندنێ دێ ل پرۆژەى هێنە زێدەکرن، و هەتا نوکە، ژمارا دار و گولێن دناڤدا هاتینە چاندن 54 هزار و 148ن، و دوو پارکێن مەزن ب درێژییا کورنیشى هاتینە دروستکرن دگەل ژمارەکا زورا کورسیان هەروەسا خزمەتگوزارییا دەست شویان و نافورێن جوانکرنێ دگەل شەلالێن وان، هەروەسا زێدەکرنا روناهیێ و دروستکرنا پرا ئاسنى ب شێوازەک نوى و چەندین کارێن دى ژى لێ هاتینە کرن.

دپلان دایە دئەڤ ساڵەدا پرۆژە ب درێژییا 30 کیلو مەتران بهێتە تمامکرن و کورنیش ب درێژییا خابیرێ زاخۆ بهێتە درێژکرن، و هەتا نوکە رووبەرێ پارکێ ب گشتى 75 هزار مەترێن دووجانە، و درێژییا پارکێ ل هەر ئالیەکێ خابیرى نێزیکى 1 کیلومێترێ هاتییە درێژکرن، و فرەهییا رووبارێ خابیرى دپارکا دەلال دا 73 مەترە، و مەزاختیێن ڤى پرۆژەیی ژ10 ملیون دولاران ل سەر ئەركێ حکومەتا هەرێما کوردستانێ دەرباز بووینە .

چییا ئەمین ل دویماهیێ دبێژیت: "پرۆژێ دەوروبەرێن خابیرێ زاخۆ بوویە سومبولا وەرارا گەشتیارى ل زاخۆ و رێژا گەشتیاران 100% بلند بوویە، و دپلان دایە پرۆژێ دەوروبەرێن خابیرى ببیتە مەزنترین کورنیش ل سەر ئاستى کوردستانێ و عراقێ".

 

سەجا شێرزاد