هه‌ولێر-KDP.info- نووسینگەی ڕاگەیاندنی پارێزگای ھەولێر ئەمڕۆ چوارشەممە ٢ی نیسانی ٢٠٢٥ ئاماری ڕووداوەکان و پلانی ئەمنی و تەندروستی سێ ڕۆژی جەژنی ڕمەزانی بڵاوکردەوە لە سنووری پارێزگای ھەولێر کە بەم شێوەیەیە.

بەپێی ئەو ئامادەکاری و پلانانەی بۆ سێ ڕۆژی جەژنی ڕەمەزانی پیرۆز، لەلایەن لیژنەی ئەمنی پارێزگای ھەولێر بەسەرپەرشتی پارێزگاری ھەولێر، بە مەبەستی پاراستنی ئارامی و ئاسایش شار و سەر و ماڵ و سەلامەتی گیانی ھاوڵاتییان ئامادەکاری بۆ کرابوو، پلانەکە وەکوخۆی و بە سەرکەوتووی و بەبێ گیر و گرفت جێبەجێکرا.

ئاماری گشتیی ژمارەی ھاتنی گەشتیاران و ڕووداوەکانی ڕۆژانی جەژنی ڕەمەزانی پیرۆزی ئەمساڵ، لە سنووری پارێزگاکەمان بەمشێوەیەی خوارەوە بووە:-

یەکەم/ گەشتوگوزار:-

سەبارەت بەپلانی گەشتوگوزار، بۆ ڕۆژانی جەژنی ڕەمەزانی پیرۆز، وەک چۆن داڕێژرابوو تەواوی بڕگەکانی وەکو خۆی و بە سەرکەوتووی جێبەجێکران، لەوانەش دانانی لیژنەی تایبەت بۆ دابین کردنی خزمەتگوزاریی پێویست بۆ گەشتیاران لە بازگەکان و دابەشکردنی ژمارەی تەلەفۆنی لیژنەکان بەسەر گرووپە گەشتیارییەکان و گەشتیاران بۆ یٔەوەی ھاوکاربن بۆ چارەسەرکردنی ھەر ڕووداوێک یان گیروگرفتێک. ھەروەھا پێکھێنانی لێژنەی تایبەت بۆ بەدواداچوون لە ڕەوشی گەشتیاران لە بنکە گەشتیارییەکان بە مەبەستی دڵنیابوون لە پێشکەشکردنی خزمەتگوزاری تەواو بە گەشتیاران لە بنکە گەشتیارییەکان. ژمارەی ئەو گەشیارانەشی تەنھا لە ڕۆژانی پشووی جەژن سەردانی ھەولێری پایتەختیان کردووە بریتی بووە لە ( ٧٦ ھەزار و ٦٥٤ ) گەشتیار.

دووەم/ ئاسایشی ھەولێر:-

بەپێی ئەو پلان و ئامادەکاریانەی لەلایەن بەڕێوەبەرایەتی ئاسایشی ھەولێر داڕێژرابوو، وەکو خۆی و بەبێ ھیچ گرفتێک جێبەجێکران و بۆ ھەرحاڵەتێکی پێویستیش، سەرجەم ھێزەکانی ئاسایش لە ئەرک دابوون.

سێیەم/ پۆلیس:-

سەرجەم ھێزەکانی سەربە بەڕێوەبەرایەتی پۆلیسی ھەولێر لە ھەموو بەش و ھۆبەکان لە ھەرسێ ڕۆژی جەژنی ڕەمەزانی پیرۆز لەئامادەباشی تەواودابوونە و پلانەکان وەک چۆن داڕێژرابوون تەواوی بڕگەکانی وەکو خۆی و بە سەرکەوتووی جێبەجێکراون، ئاماری تاوانەکان لە ڕۆژانی جەژن بەمشێوەیەی بوو، ( ٢٨ ) تاوان تۆمارکراوە، ( ٢٨ ) تاوان ئاشکراکراوە.

چوارەم/ ھاتووچۆ:-

سەبارەت بەپلانی بەڕێوەبەرایەتی ھاتووچۆی ھەولێر بۆ ڕۆژانی جەژنی ڕەمەزانی پیرۆز، وەک چۆن داڕێژرابوو تەواوی بڕگەکانی وەکو خۆی و بە سەرکەوتووی جێبەجێکران، بەڵام بەداخەوە بەھۆی پابەندنەبوونی شوفێران بەڕێنمایی و یاساکانی ھاتووچۆ و لێخوڕینی خێرا، ( ٤ ) ڕووداوی ھاتووچۆ ڕوویاندا و بەداخەوە لە ئەنجامیاندا ( ١٢ ) کەس برینداربوون.

پێنجەم/ بەرگری شارستانی:-

تەواوی بنکەکانی بەڕێوبەرایەتی بەرگری شارستانی ھەولێر بۆ ڕۆژانی جەژنی ڕەمەزانی پیرۆز لە ئەرک دابوون، لەوماویەشدا ( ٩ ) حاڵەتی ئاگرکەوتنەوە ھەبووە، سەرجەم حاڵەتی ئاگرکەوتنەوەکانیش لە لایەن تیمەکانی بەرگری شارستانییەوە کۆنترۆڵکراون و خۆشبەختانە جگە لە زیانی ماددی ھیچ زیانێکی گیانیان لێنەکەوتۆتەوە.

شەشەم/ بەڕێوەبەرایەتی گشتیی تەندروستی:

لە سێ ڕۆژی جەژن تەواوی تیمە تەندروستیەکان و نەخۆشخانەکان لە ئەرک دابوونە، لەو ماوەیەشدا ( ٥ ھەزار و ٨٧٤ ) ھاوڵاتی سەردانی نەخۆشخانەکانی سنووری پارێزگای ھەولێریان کردووە، (١١٩ ) منداڵ لە دایک بووە ( ٧١ کوڕ ) و ( ٤٨ کچ )، ( ٦٦٩ ) نەشتەرگەری جۆراو جۆر ئەنجامدراوە لەگەڵ ( ٦٢٠ ) حاڵەتی شوشتنی گورچیلە، ( ١٥٩ ) نەخۆش لە نەخۆشخانەی نانەکەلی چارەسەریان وەرگرتووە و ( ٥٢٠ ) نەخۆشیش لە سەنتەری ئاوات چارەسەری تیشکیان وەرگرتووە.

حەوتەم/ سەرۆکایەتی شارەوانی:

سەرجەم فەرمانگە خزمەتگوزارییەکان و تیمەکانی شارەوانی، لە ڕۆژانی جەژن لە ئەرک دابوونە و لەو ڕۆژانەشدا ( ٦ ھەزار و ٩٥٦ ) تۆن زبڵ و پاشماوە لە سنووری سەرۆکایەتی شارەوانی ھەولێر کۆکراوەتەوە و لە زبڵخانەی کانی قڕژاڵە چارەسەریان بۆ کراوە.

دەستخۆشی لە یەکە کارگێڕی و ئیدارییەکان و ھێزە ئەمنیەکان و بەڕێوەبەرایەتی گشتیی تەندروستی ھەولێر و تیمەکانی شارەوانی و ژینەگەپارێزان لە سەرجەم قەزا و ناحییەکان دەکەین، کە لە ماوەی چەند ڕۆژی ڕابردوو وێڕای پشووی فەرمانگەکانیان لە ئەرکدابوون، جارێکی تر وەکو پارێزگای ھەولێر ھاوڵاتییان و ھاوشاریانی خۆشەویستی ھەولێری پایتەخت دڵنییا دەکەینەوە وەک ھەمیشە لە خزمەتی ئێوەدا دەبین بۆ دەستەبەرکردن و گەیاندنی خزمەتگوزارییەکان و بە ھەموو توانایەکمانەوە بە پشت بەستن بەتوانا و چاووکراوەیی ھێزە ئەمنیەکان، شەو ڕۆژ دەخەینە سەریەک بۆ پاراستنی سەلامەتی و پارێزگاریکردن لە سەر و ماڵتان.

نووسینگەی ڕاگەیاندنی پارێزگاری ھەولێر

٢ی نیسانی ٢٠٢٥