ئەمریکا-KDP.info- ڕاپۆرتێکی نوێی زانکۆی ئیلۆن ئاشکرای کردووە کە سەدان پسپۆڕی تەکنەلۆژیا، لەوانەش ڤینت سێرف "باوکی ئینتەرنێت"، نیگەرانن کە پشتبەستنی زیاد بە زیرەکی دەستکرد دەشێت تواناکانی بنچینەیی مرۆڤ لاواز بکات، بەتایبەت هاوسۆزی و بیرکردنەوەی قووڵ.
لە کاتێکدا زەبەلاحەکانی تەکنەلۆژیا پێشبڕکێیان خێراتر کردووە بۆ پەرەپێدانی زیرەکی دەستکرد کە بتوانێت وەک مرۆڤ بیر بکاتەوە، توێژەرەوانی زانکۆی ئیلۆن پرسیارێکی جیاوازیان ورووژاندووە: ئەم تەکنەلۆژیایە چۆن شێوازی بیرکردنەوەی مرۆڤ دەگۆڕێت؟
بە پێی ڕاپۆرتی "ئایندەی مرۆڤبوون" کە لە CNN بڵاو کراوەتەوە، زۆرینەی پسپۆڕان پێشبینی دەکەن زیرەکی دەستکرد کاریگەری نەرێنی لەسەر ١٢ خەسڵەتی گرنگی مرۆیی دروست بکات لە ساڵی ٢٠٣٥، لەوانەش هۆشی کۆمەڵایەتی و سۆزداری، توانای بیرکردنەوەی قووڵ، و بڕیاردانی ئاکاری.
جۆن سمارت، ئایندەناس، لە ڕاپۆرتەکەدا نووسیویەتی: "دەترسم زۆربەی خەڵک بەردەوام بن لە واز هێنان لە توانای کاریگەری، داهێنان، و بڕیاردان بۆ ئەم زیرەکە دەستکردە هێشتا سەرەتاییانە."
نیگەرانییەکان لە کاتێکدا دێن کە کۆمپانیاکانی وەک گووگڵ، مایکرۆسۆفت و مێتا ملیارەها دۆلار وەبەردەهێنن لە دروستکردنی "ئاژانسی زیرەکی دەستکرد" کە بتوانن ئەرکەکان بە نوێنەرایەتی مرۆڤ ئەنجام بدەن.
ڕاپۆرتی زانکۆ دوای توێژینەوەیەکی مایکرۆسۆفت و زانکۆی کارنیگی میلۆن دێت کە پێشتر ئاماژەی کردبوو بە کاریگەری نەرێنی ئامڕازەکانی زیرەکی دەستکرد لەسەر بیرکردنەوەی ڕەخنەگرانە.
سێرف، کە ئێستا بەرپرسێکی باڵای گووگڵە، هۆشداریدا لە "لاوازییەکان" لەم تەکنەلۆژیایەدا و جەختی کردەوە لەسەر پێویستی وردبینی سیستەمەکان و شەفافیەت لە سەر کارایی ئەم ئامڕازانە.
زیاتر لە ٦٠٪ی بەشداربووانی ڕاپۆرتەکە پێشبینیان کرد کە زیرەکی دەستکرد تواناکانی مرۆڤ بە شێوەیەکی "قووڵ و بەرچاو" یان "بنەڕەتی، لە ١٠ ساڵی داهاتوودا وەک شۆڕشێکی سەرتاسەری بخاتە ئەم بوارەوە.
ئامادەکردن: KDP.info