Çavdêrên siyasî: Nabe PKKê li dijî berjewendiya Herêma Kurdistanê derkeve
Hewlêr-KDP.info- Çavdêrên siyasî amaje bi wê yekê dikin ku di dema ku
Herêma Kurdistanê pêngavan ber bi serxwebûnê ve davêje, PKK jî li
Bakurê Kurdistanê şerek çêkiriye û pêvajoya aştiyê têk biriye û niha
dixwaze pirsgirêkan ji Herêma Kurdistanê û perçên din ên Kurdistanê re
çêbike, lê nabe PKKê li dijî berjewendiya Herêma Kurdistanê derkeve.
Çavdêrê siyasî Şemsedîn Mihemed ji malpera KDP.info re ragihand: “Ew
şerê ku PKKê li Bakurê Kurdistanê dike cihê gumanê ye, ji ber ku bajarên
Bakur wêran kiriye û bi taybetî navçên ku Kurd tê de gelek in, hemû
wêran kirine û xelkê ji wan bar kirine û bi sedan xortên Kurdan dane
kuştin û tenê Kurdan ziyan dîtine. Eger PKK bixwaze Tirkiyê lawaz bike,
Tirkiye bi şer lawaz nabe, lê belê zerermendê mezin Kurd in û ew yek di
berjewendiya Tirkiyê de ye.”
Wî çavdêrê siyasî wiha got: “Ew rêveberiya ku niha PKKê birêve dibe,
cihê gumanê ye, wan Ocalan xistina zindanê de û êdî pir zehmet e
careke din Bakurê Kurdistanê vegere wek berê û aram bibe. Herwiha li
Başûrê Kurdistanê jî ku çavê hemû Kurdan li ser e, û gelê Kurd dixwaze
bi riya wê bi mafê xwe şa bibe û bigihê mafê xwe, lê PKKê dixwaze
destê xwe bixe nava karûbarê Herêma Kurdistanê û rê li serxwebûnê û
dewleta Kurdî bigire. Naxwazin hêzên xwe ji Şingal û Kerkûkê derxînin,
ew jî bo pirsgirêk û aloziyan derxînin û wan navçeyamn bikin kanton,
lewma bi baweriya min eger zû ew hêz ji wir neyên derxistin dê alozî û
pisgirêkên zêdetir li wir çêbibin.”
Mamosteyê zanîngehê Dr. Subhan Elî ji malpera KDP.info re ragihand:
“Pêwîst e gelê Kurd li herçar perçên Kurdistanê hişyar be û rê nede
PKKê hêj ziyanê bigihîne gelê Kurd û Kurdistanê, pêwîst e gelê Kurd hêj
xwe ji wan re bêdeng nekin û aliyên siyasî xwe bikin yek û rê nedin
serkirdatiya PKKê ku bo meramên xwe û berjewendiya welatên
navçeyê, Kurdistanê têk bidin. Herwiha Serokê Herêma Kurdistanê
Mesûd Barzanî berdewam kar li ser wê yekê dike ku careke din şerê
navxwe dernekeve û pêvajoya aştiyê dîsa destpê bike, lê PKK ji bilî
neyarên Kurdan guh li kesî nagire, herwiha pêwîst e gelê Kurd li Bakurê
Kurditanê jî li dijî siyasetên çewt ên PKKê derkeve û rê nedin wan ku
meramên xwe bikar bînin.”
Wî mamosteyê zanîngehê wiha got: “Me çaverê nedikir ku PKK ewqasî
pirsgirêkan ji Herêma Kurdistamê re çêbike, ji ber ku em hemû yek
netewe ne. Nabe PKKê li dijî berjewendiya gelê Kurd derkeve, li Herêma
Kurdistanê xetên sor hene û nabe aliyên siyasî bo berjewendiyên xwe li
dijî wan xetên sor derkevin û pêwîst e aliyên siyasî sûd ji ezmûna
Herêma Kurdistanê werbigirin. Herwiha ez hêvîdar im ku gelê Kurd li
Rojavayê Kurdistanê jî rizgar bibe û bigihên armancên xwe û eger ew li
ser riya rast herin dê Herêma Kurdistanê bi hemû awayekî piştgiriya
wan bike û baştirîn mînak jî şandina Hêzên Pêşmerge bû bo Kobanê
bû.”
Çalakvana siyasî Mehnaz Selîm jî ji malpera KDP.info re ragihand:
“Pêwîst e PKK xwe hişyar bike û nebe kerteke siyasî di destê hinek
welatên navçeyê de li dijî Herêma Kurdistanê û gelê Kurd li herçar
perçên Kurdistanê ji ber ku Herêma Kurdistanê dixwaze bigihê
serxwebûna xwe û bibe dewlet.”
