“Pênc DAIŞî hatin girtin..Nîvê gundên ereban ser bi DAIŞ ve ne”
Kerkûk-KDP.info- Berpirsê eniya Rojavayê Kerkûk û Dubiz Dr. Kemal Kerkûkî
ragihand ku terorîstên DAIŞê di êrişa îro de kuştî û birîndar dan û 5 kes ji
wan jî dîl ketin destê Hêzên Pêşmerge de.
Dr. Kemal Kerkûkî ji malpera KDP.info re ragihand: “Piştî ku îro terorîstên
DAIŞê êrişî bîrên petrolê yên Bay Hesen kirin, Hêzên Pêşmerge bi tundî
bersiva wan dan û êrişa wan têk birin.”
Derbarê ziyanên DAIŞê, Kerkûkî wiha got: “4 terorîstên xwekuj hatin
jinavbirin û çend birîndar bûn û 5 jî dîl ketin destê Pêşmerge de. Herwiha
me operasyonek li gundên ku xelkê wan ereb in lidar xist û me karî 3
terorîstan di malekê de bigirin û 2 jî bi birîndarî ketin destê me de.”
Berpirsê eniya rojavayê Kerkûk û Dubiz tekez kir ku, ewê berdewam bin li
pişkinîna navçeyê û êdî dive hesbeke taybet ligel van gundên derdora Bay
Hesen bê kirin û çareseriyeke ewlehî baş ji wan re bê dîtin, ji ber ku nabe
terorîst bi kêfa xwe biçin û bên, wek em dizanin nîvê xelkê van gundan
şaneyên veşartî yên DAIŞê ne û me îro yek girt ku birayê wî emîrekî DAIŞê
ye.
