Protokola Hewlêr-Waşinton welatên din jî han dide
Hewlêr-KDP.info- Çavdêr û siyasetmedarên kurd derbarê protokola di
navbera Herêma Kurdistanê û Amerîka de dibêjin, ew rêkeftin yek ji
destkeftên herî girîng e bo xelkê Kurdistanê. Herwiha dibêjin, kurdan
garantî ji Amerîka wergirtine û ew protokol pêwendiyên herêmê û Amerîka
ber bi pêşve dibe, ku serkeftineke mezin e bo serkirdatî û dîplomtiya
kurdan, ku ev yek dibe sedem welatên din jî protokolên wisa ligel
Kurdistanê îmze bikin.
Roja Sêşemê 12/7/2016 li Pîrmam Serokê Herêma Kurdistanê pêşwazî li
Cîgira Wezîrê Bergiriyê yê Amerîka Êlîza Slotkîn kir û protokoleke leşkerî di
navbera Hewlêr û Waşinton de hat îmzekirin û tê de tekez li ser dostayetiya
hevbeş û alîkariya Hêzên Pêşmerge hat kirin.
Siyasetmedar kurd Dîndar Doskî ragihand ku “yasaya kongrêsa Amerîka bû
sedem ku Amerîka wê protokolê ligel Hewlêrê îmze bike, ku protokoleke pir
girîng e û wek welatekî pir pêşketî reftar ligel Herêma Kurdistanê hatiye
kirin, ji ber ku Amerîka tenê çekan dide welatên pêşkeftî û ew yek
pêwendiyên Kurdistan û Amerîka pêş dixe, lewma dibe serkeftineke mezin
bo serkirdatî û dîplomasiya kurdan.”
Dîndar Doskî wiha got: “Ew protokol dibe sedema ku Hêzên Pêşmerge
zêdetir bihêz bibin û rasterast bên biçekirin û alîkariya wan bê kirin û
herwiha dibe sedem ku welatên din ên cîhanê jî wê riyê bigirin û protokolan
ligel Herêma Kurdistanê îmze bikin.Pêwîst e hemû aliyên siyasî yên Herêma
Kurdistanê bi wê protokolê dilxweş bin, ji ber ku xizmeteke mezin digihîne
xelkê Herêma Kurdistanê û nabe pirsgirêkên navxwe bandoreke xerab li wê
destkeftê bike.”
Ji aliyê xwe ve, Çavdêrê siyasî Îhsan Amêdî ragihand: “Bi hewla Serok
Barzanî ev protokol hat îmzekirin, ji ber ku karî baweriyê bi Amerîka bîne û
baweriyekê li cem wê çêbike ku Hêzên Pêşmerge take hêz e li ser erdê ku
şerê terorîstên DAIŞê dike û ew protokol yek ji destkeftên herî girîng in bo
Herêma Kurdistanê, ku ew peyamek e bo xelkê Kurdistanê û hemû cîhanê
ku Amerîka piştgiriya kurdan û dewleta kurdî dike û dê her hevpeymanê
Kurdistanê be û êdî dijmin û neyarên kurdan nikarin nêzîkî Kurdistanê
bibin.”
