Serok Barzanî: Kurd li Sûriyê ne bi tenê ne..Em her piştevanê wan in
Hewlêr-KDP.info- Di hevdîtinekê de ligel sekreter û endamên Polîtburoya
Partiya Demokrat a Kurdistanê-Sûriye (PDK-S), Serokê Herêma Kurdistanê
Mesûd Barzanî pesnê gelê kurd li Sûriyê da û ragihand ku Kurd li wir ne bi
tenê ne û Başûrê Kurdistanê bi hemû hêza xwe piştevaniya mafê wan ê
rewa li Sûriyê dike.
Îro Pêncşemê 2.6.2016 li Pîrmam Serokê Herêma Kurdistanê Mesûd Barzanî
pêşwazî li Sekreterê PDK-Sê Siûd Mela û endamên Polîtburoya wê partiyê
kir.
Di wê hevdîtinê de Siûd Mela spasiya xemxurî û piştgiriya Serok Barzanî bo
doza kurd li Sûriyê û alîkariya wî û Herêma Kurdistanê bo gelê kurd li Sûriyê
û ragihand ku partiya wî piştrast e ji piştevaniya Serok Barzanî û da zanîn ku
ewê bi wê piştevaniyê berdewam bin li ser xebata xwe heta ku bigihên
armancên xwe yên netewî, ji ber ku ew ji dibistana Barzaniyê Nemir fêrî
qurbanîdan û berxwedan û mêrxasiyê bûne û kurd li Sûriyê bi hêvî
tehemûla wê dijwariyê dikin.
Her di vê hevdîtinê de şanda mêvan rewşa meydanî û siyasî ya Sûriyê û
pêwendiya aliyên kurd ligel opozisyonê bo Serok Barzanî şirove kirin û
daxwaz kirin ku Serok Barzanî şêwir û amojgariyên pêwîst bide wan.
Ji aliyê xwe ve Serok Barzanî pesnê xoragiriya gelê kurd li Sûriyê da û
ragihand ku Kurd li wir ne bi tenê ne û Başûrê Kurdistanê bi hemû hêza xwe
piştevaniya mafê wan ê rewa li Sûriyê dike. Herwiha da zanîn ku Partiya
Demokrat a Kurdistana Sûriyê alîkariya Şoreşa Gulanê daye û ev yek qet
nayê jibîrkirin.
Di vê civînê de nêrîn derbarê paşeroja Sûriyê û doza rewşa ya gelê kurd
hatin pevguhertin û Serok Barzanî şêwir û amojgariyên pêwîst bo pêşhatan
da wan.
