“Serdana şanda Kurdistanê bo Bexda, ji ber serdana Kerry bo Bexda bû”
Bexda-KDP.info- Çavdêrekî siyasî dibêje mebesta serdana vê carê
ya şanda Hikûmeta Herêma Kurdistanê bo Bexdayê zêdetir
pêwendî bi serdana Wezîrê Derve yê Amerîka John Kerry bo
Bexdayê hebû, da ku gotûbêkirineke bo hemû aliyên Iraqê
derbarê komek pirsan bikin.
Ebdulhekîm Xesro Çavdêrê Siyasî û Mamostayê Zanîngehê ji
malpera KDP.info re behsa serdana duhî ya şanda hikûmeta
Herêma Kurdistanê bi serokatiya Nêçîrvan Barzanî bo Bexdayê kir
û ragihand: “Ew serdan zêdetir pêwendî bi wê yekê hebû ku ligel
Wezîrê Derve yê Amerîka û aliyên Iraqê pêk ve li ser paşeroja
Iraqê û şerê DAIŞê û kirîza darayî biaxivin, ji ber ku heta niha
Amerîka xwe wek berpirsyar dibîne di ber Iraqê de, lewma
dixwaze berdewam pêwendî di navbera aliyên siyasî de hebe.”
Xesro wiha got: “Di cih de nakokiyên di navbera Hewlêr û Bexda
de çareser nabin, lê ya girîng aramiya siyasî li Iraqê berdewam be
û çaksazî were kirin û hikûmet pêk were û kurd jî bo berjewendiya
xwe û berdewamiya pêwendiya ligel Amerîka di hikûmeta Ebadî
de beşdar bûye, ne ji bo çareserkirina hemû pirsgirêkan.”
Dr. Ebdulhekîm wiha domand: “Eger em ji Iraqê cuda jî bibin û
serxwebûnê rabighînin jî dê danûstandin û gotûbêjên me bi Iraqê
re berdewam bin, ji ber ku gellek dosye û pirsên hevbeş di
navbera Hewlêr û Bexda de hene wek sînor û av û dewleta Iraqê û
para kurdan ji mîrata Iraqê.”
