Husên Medenî: PKK bela ye..Qet di berjewendiya gelê kurd de kar nekiriye
Hewlêr-KDP.info- Şêwirmendê Polîtburoya Hizba Demokrat a Kurdistanê
Husên Medenî ragihand ku ligel ragihandina dewleta serbixwe ya kurdî dê
hevsengî têk biçe, lewma jî pir girîng e ku ew kurdatetiyê bikin ne
hizbayetiyê. Herwiha dibêje PKK bela ye bo tevgera rizgarîxwaz a
Kurdistanê, ji ber ku girêdayî hizrekî felsefî siyasî û aydelojî serdema Stalîn e
û dîktatoriyeke mezin e û kesekî din qebûl nake.
Husên Medenî, ew pirsgirêkên ku li Rojhilata Navîn hene, ne tenê rastî
kurdan hatine. Lê belê Îran jî yek ji wan welatan e û çendîn pirsgirêkên wê
hene û bi asanî jê derbas nabe.
Wî Şêwirmendê Polîtburoya Hizba Demokrat a Kurdistanê ji Kovara Gulan re
ragihand, ji dema perçekirina Kurdistanê û heta niha ti demê wek niha
herçar dewletên dagîrkerên Kurdistanê wek niha nebûne dijî hev û ew dem
çû ku dîsa hevpeymaniya ligel hev girê bidin. Ji ber ku niha pirsgirêkên
herçar welatan hene. Îran li navçeyê li hemberî ereban lawaz dibe, û ne di
berjewendiya Amerîka de ye ku Îran li navçeyê wisa lawaz bibe.
Derbarê biryardana Serokê Herêma Kurdistanê Mesûd Barzanî bo
lidarxistina referandûmê li Başûrê Kurdistanê û giringiya wê û zemînesazî bo
serxwebûna Kurdistanê, Husên Medenî ragihand ku, beriya niha jî
referandum hatibû kirin û xelkê gotina xwe gotibû û daxwaza serxwebûnê
kiribûn. Herêma Kurdistanê bê ku serxwebûna xwe rabighîne wek
dewleteke dîfakto li cîhanê tê naskirin û tişta ku maye ku aboriya wê jî bibe
serbixwe û budceya xwe peyda bike.
Husên Medenî wiha got: “Ji roja ku Barzanî ragihandiye ku ewê
referandumê lidar bixin û heta niha, medya û ragihandinên Îranê êrişên
nerewa dikin ser Barzanî û PDKê û sedema wê êrişê jî ew e ku ligel
serxwebûna Kurdistanê dê hevsengiya navçeyê têk biçe û eger em bi jîrane
kar nekin emê jî rastî pirsgirêkan bibin. Herwiha baş bû ku Serok Barzanî
niha behsa referandumê kir. Pêwîstî bi karê dîplomatîk heye ji ber ku Îran bi
bername kar dike û pêngavan davêje. Pir girîng e ku niha em kurdayetiyê
bikin, ne hizbatiyê.”
Medenî wiha domand: “Partiyên Rojhilatê Kurdistanê rêz li serweriya
Hikûmeta Herêma Kurdistanê digirin, lê PKK ku îdia dike ew partiyeke
kurdistanî ye, ni eşkere dijayetiya Hikûmeta Herêma Kurdistanê dike û
astengiyan ji pêvajoya serxwebûna Kurdistanê re derdixe. Em matmayî
namînin dema ku PKKê dijayetiya Kurdistanê û serxwebûnê dike, ji ber ku jê
ne tiştekî xerîb e. PKK bela ye bo tevgera rizgarîxwaza Kurdistanê ji ber ku
girêdayî hizrekî felsefî siyasî û aydelojî serdema Stalîn e û dîktatoriyeke
mezin e û kesekî din qebûl nake. Dema aliyekî dibîne ku ne ligel nêrîna wê
ye di cih de şerê wê dike û şirîkatiya ti alî qebûl nake. PKK bi heman wê
tundiya beriya 30 salî helwestê dike. Herwiha wek Mafyaya madeyên hişbir
tên naskirin û Îran wê li dijî Tirkiyê bikar tîne. PKK qet di berjewendiya gelê
kurd de kar nekiriye û tenê armnaca wê tevlihevî ye. Ne ligel dewleta kurdî
ye û li dijî ala Kurdistanê ye. PKK ne partiyeke netewî ye.”
