Demîrtaş: Emê rê li ber paketê ewlekariya civakê bigirin
Bakurê Kurdistanê-KDP.info- Selahattin Demîrtaş Hevserokê Partiya Demokratîk a Gelan (HDP) got ewê bi rêya meş û çalakiyan rê li ber derbaskirina paketa ewlekariya civakê li parlamentoyê bigirin. Herwiha da zanîn ku, hikûmeta AK Partiyê, Kobanê kiriye hincetek ji bo derkirina yasaya ewlekariya civakê.
Pakêta ewlekariyê ew e ku li nav Tirkiyeyê zêdetir desthilat bigihê hêzên ewlekariyê, ku niha hikûmeta AK Partiyê dixwaze li parlamentoyê bide pesend kirin.
Hevserokê HDPê Demirtaş bo rojnameya Bugunê ragihand ku ewê bi rêya meş û çalakiyan re rê li ber derbaskirina pakêta ewlekariya civakê li parlamentoyê bigirin.
Di derbarê axaftinên Serokomarê Tirkiyeyê yên ku hertim HDPê tometbar dike jî, Hevserokê HDPê wiha anî ziman ku hikûmeta AK Partiyê, Kobanê kiriye hincetek ji bo derkirina yasaya ewlekariya civakê.
Li ser pêvajoya aştiyê jî, Demîrtaş bal kişand ku berdewamiya pêvajoyê, girêdayî naveroka nexşerêya Ocalan e û got, heger hikûmet di çarçoveya wê nexşerêyê de rêkeftinan qebûl neke, dê ti şansek ji bo berdewamiya pêvajoyê nemîne.
