Çûna pêşmerge bo Kobanê pêwîstî bi fermana Serokatiya Herêmê û Parlamentoyê heye
Hewlêr-KDP.info- Wezareta pêşmerge ya hikûmeta herêma Kurdistanê ragihand ku, çûna hêza pêşmerge bo Rojavayê Kurdistanê bo hevkarîkirina xelkê Kobanê, pêwîstî bi fermana serokatiya Herêmê heye.
Emîd Helgurd Hîkmet, birêvebirê ragihandin û rewşenbîriya wezareta pêşmerge a hikûmeta Herêma Kurdistanê ji KDP.info re ragihandiye ku: “Heya niha hêza pêşmerge bi mebestî alîkarîkirina xelkê Kobanê bo Rojavayê Kurdistanê nehatiye livandin, çûnkî pêwîstî bi fermana serokatiya herêmê û parlemana Kurdistanê heye.”
Emîd Helgurd got: “Çi demê ferman bo me hat, em amadene biçin Rojavayê Kurdistanê û berevaniyê li Kurdên wê navçeyê bikin.”
Eve çend rojin DAIŞ ji çendîn qolan ve êrişên hovane bo ser Kobanê destpê kiriye û heya niha 60 gundên wê herêmê dagîr kirine û ji ber wê jî bi hezaran malbatên Kurd mal û mulkên xwe bi cî hêştine û piraniya wan jî berê xwe dane Tirkiyê.
