DAIŞê Konsolosê Tirkiyê û hevkarên wî berdan

Hewlêr-KDP.info- Rêxistina DAIŞê welatiyên Tirkiyeyê yên ku di destê DAIŞê de bûn berdan û niha li Tirkiyeyê ne.

Serokwezîrê Tirkiyeyê Ahmet Davûtoglu, îro danê sibê saet 06.10 ragihand ku Serkonsulê Tirkiyeyê yê Mûsilê û 48 welatiyên Tirkiyeyê yên ku zêdetirî 3 mehan bû di destê DAIŞê de bûn, hatin berdan.

Davûtoglu wiha axivî: “Piştî xebateke bi rojan û hefteyan me karî berbanga vê sibê welatiyên xwe wergirin û bînin welatê xwe. Ez pir kêfxweşî im ku vê xeberê didim. Hemû jî sax û silamet in.”

Serokwezîrê Tirkiyeyê anî ziman ku rola MÎTê di rizgarkirina wan welatiyên Tirkiyeyê de girîng bû lewma ew ji MÎTê spas dike û da zanîn, 49 welatiyên Tirkiyeyê yên di destê DAIŞê de bûn îro saet 05.00 derbasî welêt bûn.

Ahmet Davûtoglu ragihand: “Niha dîlên me derbasî ser sînor bûn û ber bi Rihayê ve diçin. Ezê jî ji vir yekser herim Rihayê û wan bibînim.”