John Kerry: Ebadî amadeye kêşeyên Bexda û Kurdan çareser bike

Ajans-KDP.info- Wezîrê Derve yê Amerîkayê John Kerry piştî hevdîtina xwe ya bi Serokwezîrê Iraqê Heyder Ebadî re got, “ Serokwezîrê nû amede ye kêşeyên navbera Bexda û kurdan gavek zûtir çareser bike.”

Kerry îro berdesê sibê gihîşt Bexda paytextê Iraqê û ji hêla Wezîrê Derve yê Iraqê Îbrahîm Caferî ve hat pêşwazîkirin. Kerry piştre bi Heyder Ebadî Serokwezîrê Iraqê hate ba hev û derbarê borandina qeyrana Iraqê gotûbêj kirin.

Wezîrê Derve yê DYAyê Kerry piştî civîna bi Ebadî re civîneke çapemenî lidar xist û got, “Amerîka piştgiriya plan û hewlên serokwezîrê nû dike ku başbûneke berfireh li Iraqê saz bike.”

Kerry, di berdewama axaftina xwe de wiha got: “Serokwezîrê nû yê Iraqê amade ye, bi awayeke lez kêşeya dosyeya petrolê ya li gel kurdan çareser bike. Her wiha amadeye daxwazên sunneyan jî di vê hikûmete de bicih bîne.”