Bexda.. Girûpek ser bi Malikî ve êrîşî Kurdan dike û hejmarek ji wan revanidine

Bexda_KDP.info-Girûpa bi navê “Esayib Ehil El-Heq” ku ser bi Malikî ve ye, gefan li Kurdên li Bexdayê dike û hejmarek ji wan revandine. Berpirsê PDKê li Bexdayê jî dibêje: Ew  girûp zêdetir armanca wan PDKê ye. Şêwermendê Wezareta Koç û koçberan ya Iraqê jî pêşniyar dike ku hikûmet çareseriyekê ji wan re bibîne.

 

Sebah Akreyî, berpirsê liqa 5 ya Partiya Demokrat a Kurdistanê ji KDP.info re ragihand: Gef li Kurdên li Bexda hatiye xwarin, bi taybetî endamên PDKê û îro li navçeya Zeferaniye çekdarên ser bi girûpa Esayib Ehil El-Heq êrîş birin ser 2 malbatên Kurd.

 

Akreyî got jî: Qeyis Xez Elî serokê girûpa Esayib Ehil El-Heq di daxuyaniyeke tilivizyonî de behsa wê yekê dike ku, wan xwe amadekiriye û ew ne dijminê Sûneyan in, lê belê ew dijminê pêkhateyekî dine, ku mebesta wî jî Kurdin.

 

Sebah Akreyî derbarê wan gef û êrîşan ku li ser wan hatine kirin, got:  Me serkirdayetiya xwe ji van êrîşan agahdar kiriye, ku girûpa Esayib Ehil El-Heq zêdetir mebesta wan Partiya Demokrat a Kurdistanê ye, ew girûp ser bi Nûrî Malikî ve ne û bi otombîlên hikûmî dicing û tên.

 

Ji aliyê xwe ve, şêwermendê Wezareta koç û Koçberan ya Hikûmeta Iraqê, Adil Nûrî, ji KDP.info re got: Piştî têkçûna rewşa Iraqê, bi taybetî navçeyên Sûniyan, rêyên navbera Bexda-Kerkûk û Bexda-Celewla hatin girtin, komek girûpên çekdar ku ser bi Şieyan ve ne, dest bi êrîşên ser Kurdan kirin û hejmarek ji wana revandine, cihê dilxweşiyê ye me karî 5 ji wana bi peran rizgar bike, lê mixabin 4 jî şehîd ketin û niha jî çend kes jî çarenivîsa wan nediyare.

 

Adil Nûrî got: Me bangewaziyek belav kiriye ku Kurd bi wan rêyên han neyên Bexdayê, ew ê ku bi van karan radibe Qeys Xez Elî ye, ku serokê girûpa Esayib Ehil El-Heq e, û bi eşkere gefan li Kurdên li Bexdayê û Babil û Kut dike.

 

Nûrî herwiha diyar kir: Heta niha me kariye nêzîkî 500 hezar Kurd vegerînin Herêma Kurdistanê, hîn jî bi deh hezaran li Bexdayê mane û nikarin vegerin û ew girûpên çekdarî jî wan têşîne û sivkatiyê bi wana dikin, ji ber vê jî xwe di male xwe de veşartine.

 

Şêwermendê Wezareta koç û Koçberan ya Hikûmeta Iraqê, got: Ez rêya malpera we de, pêşniyarekê dişînin ji hikûmeta Herêma Kurdistanê re, da ku çareseriyekê ji wan Kurdan re bibîne û hewl bidin bo vekirina rêya Xaniqîn-Kut, ji bona ku ew Kurd vegerin Kurdistanê.

 

Adil Nûrî got jî: Ji bilî wan kesên ku dixwazin vegerin, gelek Kurdên akinciyê Bexdayê hene, lewra divê ligel serkirdeyên Şieyan goftûgo bê kirin ji bona ku cardin Kurd nebin armanc, û ew kes û aliyên ku bi van karan radibin bên siza dan, ji ber ku niha bi hezaran Erebên Sine û Şîye li Herêma Kurdistanê jî bi aramî dijîn.

 

Di dawiyê de, şêwermendê Wezareta koç û Koçberan ya Hikûmeta Iraqê, daxwaz ji Kurdên li Bexdayê yên ku dixwazin vegerin Herêma Kurdistanê kir ku hemû li cihekî kom bibin, da ku ew bi belafiran wan vegerînin