Swêd û Kurdistanê rewşa penaberên Rojava nirxandin
Hewlêr-KDP.info/ Li bajarê Hewlêrê Felah Mistefa berprisê têkeliyên derve yê hikûmeta herêma Kurdistanê pêşwazî li Cesîka Svardstrom berpirsa ofîsa sefaretxaneya Swêdê a li Hewlêrê kir û di civînekê de rewşa siyasî û emnî ya Iraqê, pirosesa pêkanîna kabîneya nû a hikûmeta Kurdistanê û rewşa penaberên surî yên li herêma Kurdistanê gotûbêj kir.
Di cviînê de ku, Suham Cebelî alîkara berprisê têkeliyên derve made bû, Felah Mistefa behsa encamên serdana şandeya herêma Kurdistanê a bi serokatiya Nêçîrvan Barzanî bo Bexdayê kir û got ku, herêma Kurdistanê dixwaze hertim hemû pirsgirêkan li gor destûra Iraqê û bi rêya diyalogê çareser bike.
Rewşa siyasî û emnî ya Iraqê û bi taybetî rewşa aloza wîlayeta Enbarê û pirosesa hilbijartinên parlamentoya Iraqê ku, biryare di 30ê meha nîsana îsal de bên kirin hatin gotûbêj kirin û Misetfa hêvî kir ku, hikûmeta Iraqê a federal bikar bi hekîmane wan kirîzan çareser bike.
Rewşa penaberên surî yên li herêma Kurdistanê mijareke din a civînê bû û her du aliyan dilgiraniya xwe diyar kir ku, her roj hijmareke zêde ji xelkê medenî dibine qurbaniyên şerî û nêzîkî 3 milyon kes jî derbeder bûne. Di vê çarçoveyê de berpirsê têkjeliyên derve got ku, divê civaka navdewletî zêdetir di hewara penaberan biçe û alîkariyên pêwîst pêşkeşî wan bike.
