Êzdî bi kursiya kota razî nabin û dê penayê bibin Dadgeha Fêdralî
Rojnama Evro/ Endameka kurd ya Êzdî li Civata Nûnerên Îraqê rexneyên tund li qanûna nû ya helbijartinan girt, ku ji aliyê civata nûneran ve hatî ye pesendkirin, û ragehand mafê êzdiyan pênc kursiyên kota bûn, lê bi tinê yek kursî bo hatî ye dan, lewma dê tanê li vê qanûnê deyn û dawayekê li dadgeha fîdiralî dijî serokê civata nûneran tomar keyin, lê endamekê êzdî li civata parêzgeha neyinewa dibêje lawaziya perlemantarên Êzdî li bexda egerê vê çendê bû.
Viyan Dexîl perlemantara kurd ya Êzdî ji hevpeymaniya Kurdistanî li civata nûnerên Îraqî got, terxan kirina yek kursiya kota bo Êzdiyan li civata nûneran naguncît li gel hijmara kurdên êzdî ku digehe nêzîkî 600 hizar kesan.
Viyanê aşikirakir, dadgeha fîdiralî li Bexda bi biriyara xwe ya hijmar 11 li 4/6/2010 gutbû "pêdivî ye kursiyên kota bo Êzdiyan bihêne zêdekirin û yek kursiya kota bi çu şêwekî nagunce li gel hijmara Êzdiyan "û bi biriyarên vê dadgehê di vebirin û pêdivî ye bihêne bicihînan, her çende me di kombûnên serokên lîstan û lijnên civata nûneran da çendîn caran daxazkir kursiyên kota êzdiyan bihêne zêdekirin, lê ev çende li berçav nehate wergirtin û em perlemantarên Êzdî ji rûniştina civatê derkeftîn weku nerazîbûnek û me li bere tanê li qanûna helbijartinan bideyn li dadgeha fîdiralî ji ber vê egerê.
Dadiwer Wayl Ebdulletîf wezîrê berê yê karubarên herêm û parêzgehan li dor vê pirsê bo evro gut, pêdivî ye Êzdî dest ji kota berden û pişt bestinê bi berbijarikirinê biden ji ber ku hijmara wan weku ew dibêjin li ser 500 hezar kesane û eve wê çendê di gehîne ku dê kursiyên pitir ji hijmara kursiyên kotayê bo terxankirîn bi destiveynin.
Li dor hijmara perlemantarên kurdên Êzdî li civata nûnerên Îraqê di vê xulê da, viyan dibêje, em şeş perlemantarên Êzdî dinav lîsta hevpeymaniya Kurdistanî da hene û perlemantarek jî li ser kota êzdiyan heye.
Di bersiva pirsiyareka (evro) da, heke dadgeha fîdiralî biriyardaye kuta Êzdiyan bihête zêdekirin û biriyarên wê di vebirbin û pêdivê bihêne bicihînan, çewa civata nûneran kota Êzdiyan zêdenekir? Vê perlemantara êzdî gut, dê dawayekê dijî serokê civata nûneran li dadgeha fîdarlî tomarikeyin, ji berku ew biriyarên wê dadgehê bicih nayne û çu hizran jî bo wê naket û deqê biriyara dadgehê jî dibêjît "pêdivî ye kuta êzdiyan li dûv hijmara wan li helbijartinên 2014 bihête zêdekirin ".
Xoyakir jî, li destpêkê me daxwaza pênc kursiyan dikir weku kota ji ber ku hijmara êzdiyan di ser 500 hezar kesan daye, lê gutin çu serjimêrî nehatine kirin ku bi dirustî hijmarê bizanîn, lewma me daxwaza sê kursiyan kir, lê ewjî li berçav nehate wergirtin.
Li dor rolê hevpeymaniya Kurdistanê dibêjît, buçûna hevpeymaniyê li gel mebû û berevanî ji me dikir û nûnerên me di danustandinan da li dor vê pirsê serok û cêgirê lîsta hevpeymaniya Kurdistanî bûn, lê têbîniyên hevpeymaniyê li berçav nehatine wergirtin.
