Muftî: Destûr di hemû qonaxan re derbas bûye û êdî divê milet biryarê li ser bide

Herçiqas heta niha Yekîtiya Niştimanî ya Kurdistanê (YNK) derbarê destûra Kurdistanê de helwêsta xwe ya fermî ranegehandiye, lê belê li gor Endamê Polîtburoya YNK-ê û serokê gera dûyem a Parlamentoya Kurdistanê Ednan Muftî, " Destûr di hemû qonaxan re derbas bûye û êdî divê milet biryarê li ser bide."

Di hevpeyvînekê de ligel govara Gulan Ednan Muftî bi awayekî eşkere got: " Nûnerên hemû aliyên siyasî, neteweyî û olî yên Kurdistanê di lijneya dariştina vê destûrê de cîh digirtin û hemûyan jî deng li ser daye, loma di warê yasayî de hemû qonax derbas kirine, ti têkilî bi serokê herêmê û parlamentove nemaye û divê bikeve referandûmê-rapirsiyê."

Muftî wiha dibêje: " Eger têbiniyên aliyên siyasî jî li ser hebin, divê hevdengiyek siyasî çêbikin û ji vêna jî girîngtir divê li derveyê parlamentoyê minaqeşeyê li ser projeya destûrê bikin, piştre wek paşkoya projeyê pêşkêşî parlamentoyê bê kirin daku parlamento bixe bernameyê kar û eger dengê piraniya parlamenteran bidest anî, êdî were pesend kirin."