سەرۆك تاڵەبانی سەرەخۆشیی لە سەرۆك بارزانی كرد
بە بۆنەی كۆچی دوایی خاتوو خەدیجە شێخ عەبدولسەلام بارزانی براژنی سەرۆك مەسعوود بارزانی، بەڕێز جەلال تاڵەبانی سەرۆك كۆماری عێراق پرسەنامەیەكی ئاڕاستە كرد.
ئەمەش دەقەكەیەتی:
برای بەڕێز و خۆشەویستمان جەنابی سەرۆك مەسعوود بارزانی
بە خەم و پەژارەیەكی زۆرەوە هەواڵی كۆچی دوایی براژنی بەڕێزتان و هاوسەری خوالێخۆشبوو شێخ عوبەیدوڵڵا، خاتوو خەدیجە شێخ عەبدولسەلام بارزانیـمان پێ گەییشت.
بەم بۆنە خەمناكەوە بە گەرمی سەرەخۆشی لە جەنابتان و خانەوادەی خوالێخۆشبوو و بنەماڵە بەڕێز و تێكۆشەرەكەتان دەكەم و هاوخەمیی خۆمتان پێ ڕادەگەیەنم، خۆتان و برا و هەموو رۆڵەكانی بنەماڵە ناسراوەكەتان خۆش بن و تەمەنی درێژی بۆ ئێوەی بەڕێز و كەسوكارتان جێ هێشتبێت.
لە خوای گەورە دەپاڕێینەوە كە گیانی خوالێخۆشبوو بەر رەحمەتی خۆی بخات و بە بەهەشتی بەرینی خۆی شاد بكات و سەبووری و ئۆقرەییتان پێ بدات.
لە كۆتاییدا دووبارە پرسە و سەرەخۆشیی گەرمی خۆم ئاڕاستەی بەڕێزتان و خانەوادەی خوالێخۆشبوو دەكەم و هیوادارم لە هەموو بەڵا و كۆستێك بەدوور بن.
انا لله وانا الیە راجعون
برای دڵسۆزتان
مام جەلال
