سەرۆكێ كوردستانێ ل گەل بەشا كوردی یا دەنگێ روسیا

٭ برێز جەنابێ سەرۆك د دەستپێكێ دە، ئەم گەلەك ب خێرهاتنا وە دكن، ب ناڤێ خەباتكارێن دەنگێ روسیا ل ڤێ سەردانا دیرۆكی دە ئەم سەركەفتنێ ژ بۆ وە دخوازین، جەنابێ سەرۆك بەری 60 سالان بارزانیێ نەمر مەلا موستافا بارزانی دەرگەهێ كرەملینا مۆسكۆوایێ دا و گۆت ئەڤە دەنگێ نەتەوەیا كوردە. ئیرۆ هون ب ئاوایەكە فەرمی وەكی سەرۆكێ هەرێما كوردستانێ سەردانا روسیایێ دكن. گەلۆ د ستراتەژیا كوردستانێ دە، پێوەندیا ل گەل روسیایێ چ جیهەك دگرە؟
سەرۆكێ كوردستانێ: وێ رۆژا كو جەنابێ بارزانیێ نەمر دەرگەهێ كرەملینێ دا ئەو رۆژا دەستپێكێ بوو ژ بۆ ڤەكرنا دەرگەهێ كرەملینێ و مۆسكۆوا ب روویێ نەتەوەیا كورد. ئیرۆ ئەڤە ژی درێژەپێدانا وێ خەبات و وێ تێكۆشینێیە. بێگومان هەموو دەمان هەبوویە پێوەندیێن مللەتێ كورد و مللەتێن روسیا و ئەڤ پێوەندی گەلەك كەڤنن هەتا دەما قەیسەرێ روسیا ئەڤ پێوەندی بەردەوام بوون، و ئەم هێڤیدارین ژ بۆ پاشارۆژێ ئەڤ پێوەندی بەرەڤ پێشتر بچن و بەرژەوەندیا هەر دو ئالیان دە بە.
٭ جەنابێ سەرۆك بێگومان ژ بلی تێكلیێن دو ئالی، ژ بلی رەوشا هەرێما كوردستانێ یا سیاسی و رەوشا عیراقێ یا سیاسی، گەلەك بابەتێن ناڤنەتەوی ژی هونێ ل گەل بەرپرسێن سیاسی یێن روسیایێ رە گوفتووگۆ بكن. ب تایبەتی ژی ئەز باوەرم كریزا(قەیرانا) سوریێ یە. گەلۆ هون دخوازن چ پەیامەك ب ناڤێ كوردێن سوریە بگهینن بەرپرسیارێن روسیا و هون هێڤیا چ هەلوەستەكی ژ وان دكن، ژ بۆ كوردستانا سوریە(رۆژاڤا)؟
سەرۆكێ كوردستانێ: بێ شك ئەمێ بیر و بۆچوونێن خوە ئالوگۆر بكین ل گەل سەركردایەتیا روسیا رە، د دەربارێ هەموو بابەتان و بێگومان یەك ژ وان بابەتان ژی مەسەلەیا سوریە یە. لێ پەیامەكە دیاركری ژ بۆ كوردێن سوریە توونە، لێ بێ شك ئەمێ ئالوگۆریا بیر و باوەریێن خوە بكین، ئەوێ مە دڤێتن ئەوە كو مللەتێ سوریە بریارا چارەنڤیسا خوە بدە و ئێدی ئەڤ خوین نەیێ رێهتن و بلا مللەتێ كورد ژی مافێن خوە شاد ببە، نەكو بمینە مەحروم وەكی بەری نها.
٭ ئەزبەنی پرسەكە مە ل سەر رەوشا عیراقێ هەیە، ل 2010 دە وە دەستپێشخەریەك كر و عیراقێ ژ قەیرانەكە پر دژوار دە رزگار كر، ئیرۆ ئەو رەوش دووبارە دبە ب رەنگەكە هێ توژتر، د ناڤبەرا هەرێما كوردستانێ و دەستهەلاتا عیراقێ دە، د دەربارێ وان ماددەیا 140 و دەڤەرێن دەرڤەیێ كوردستانێ و یێن دن، ئیرۆ دەما كو هون دوبارە دەستپێشخەریەكە نوو دروست بكن، گەلۆ دێ مافێ كوردان یێن وەكی ماددەیا 140 و پێشمەرگە، نەفت و گاز كو ب لەز بێتە چارەسەركرن هونێ ب چ رەنگی و چ مەكانزمایەك ژ بۆ وێ دبینن؟
سەرۆكێ كوردستانێ: نها دانوستاندنێن مە بەردەوام دكن، هێزێن كوردستانی و هێزێن عیراقی ژی، دەما كو ئەز ژ ڤەگەرم ژی دیسا دێ دانوستاندن و شێورینێن مە ل گەل وان دە بەردەوام ببن. ئەمێ ببینن كا چ مومكینە و دكارە چ بێتە كرن، هەلبەت هەر تشتەكە نوو بێتە كرن و هەر پەنگاڤەك دە دڤێ هەم كێشەیا هەرێمێ ل گەل بەغدا و هەم ژی كێشەیا عیراقێ ب ئاوایەكە گشتی بێتە چارەسەركرن، هەر چەندە ل پەیمانا هەولێرێ دە یا ل سالا 2010 ئەڤ بابەت هەموو ل سەر ئیتتیفاق هاتبوو كرن، لێ ئیلتیزاما وێ ب جیهكرنا وێ نەهاتە كرن. لێ ڤێ جارێ ئەگەر هەر بریار و پەیمانەك بێتە وەرگرتن دڤێ ئیلتیزامەكە تەمام بێتە كرن.
٭ گەلۆ هونێ ژ بۆ ب جیهكرنا وان دەمەكە دەستنیشان بكن؟
سەرۆكێ كوردستانێ: هەلبەت یەك ژ وان خالان ژی ئەوە كو دڤێ دەم بێتە دەستنیشانكرن.
٭ جەنابێ سەرۆك جارەكە دن ئەمێ ڤەگەرن ل سەر رەوشا عیراقێ، ئیرۆ هەرێما كوردستانێ ل عیراقێ دە بێهتر چ هێزەكی نێزیكی خوە دبینە كو ل گەل وان دە هەڤپەیمانیەك چێ بكە؟ ب تایبەتی كو پشتی هەڤپەیمانیا كورد و شیعی هنەكی هەژیا؟
سەرۆكێ كوردستانێ: هەڤپەیمانیا مە ل گەل گەلەك هێزان رە هەیە، هەم ل گەل سوننی و هەم ل گەل شیعی ژی هەیە، راستە دبە كو هنەك كێشە و پرسگرێك هەبن، لێ بەلێ تەنێ ب ئالیەكە شیعی رە هەیە، نەكو هەموو شیعی. ژ بەر هندێ هەڤپەیمانیا مە بەردەوامە و مومكینە ل پێنگاڤێن پێش دە ئەو شاشیێن كو دروستبوونە ژی نەمینن.
٭ جەنابێ سەرۆك پرۆژەیا نشتمانیا كوردی یا ژ بۆ دەولەتەكە كوردی، ژ هشێ تو كوردەكی دە نەچوویە، ئیرۆ هەرێما كوردستانێ ناڤەندە ژ بۆ هەموو فكر و هزرا نەتەوی، ل هەڤدیتنێن خوە یێن ناڤدەولەتی دە، گەلۆ هون ڤێ پرسێ یا د دەربارێ چارەسەركرنا پرسا كورد ل توركیە، سوریە و ئیرانێ، هون ب چ رەنگی بەرپێش دكن، ب رەنگێ پرۆژەیا نەتەوەییا دەمدرێژ ئان هەر پەرچەیەك ل گۆر هال و مەرجێن خوە؟
سەرۆكێ كوردستانێ: هەر پارچەیەك ل گۆر رەوش و مەرجێن خوە، ژ بەر كو هەر پارچەیەك تایبەتیەكە خوە هەیە. پرسگرێكێن خوە یێن جوودا هەیە، واتە نە شەرتە پرسێن وی ل گەل پارچەیێن دن بن.
٭ ئیرۆ ئەڤ پەنگاڤا كو حكوومەتا توركیە داڤێژە دانوستاندنێ ل گەل عەبدوڵڵا.ئوجالان دكە، ژ بۆ چارەسەركرنا پرسا كورد، نێرینا وە یا ل ڤی دەرباری دە چیە؟
سەرۆكێ كوردستانێ: ئەم پشتەڤانیێ لێ دكین و ئەم ب پەنگاڤەكە راست و دروست دبینن، ژ بۆ پشتەڤانیێ هەر چ ژ دەستێ مە بێ، ئەم ئامادەنە بكن.
٭ جەنابێ سەرۆك وە هەستا خوە ب گشتی گۆت سەبارەت ب چالاكیا ئیرۆ، نە تەسادوف بوو كو یەكەم چالاكی ل روسیایێ ڤەكرنا ڤێ یادگاریا نەمر مەلا مستافا بارزانی بوو. هەژمارەكە مەزنێ گەلێ كورد ل ڤر ژی دژی و ئەڤ هەژمار جارنان هنەك گلی و گازندان دكن، دبێژن ئەم بێ خوەدی نە، براستی ژی زمانێ خوە ژی وەندا دكن، ژ بۆ چ حكوومەتا هەرێما كوردستانێ پشتگریا كولتوری نادە كوردێن سۆڤیەتێ، وەكە ناڤەندەكە كولتوری كو جەژن و داب و نێریتێن وان وەرە ڤەژاندن. پرۆژەیەك هەیە كو حكوومەتا هەرێما كوردستانێ پشتگریا كولتورا كوردێن روسیایێ بكە؟
سەرۆكێ كوردستانێ: هەلبەت دڤێ بێتە نرخاندن، كا چ پێویستە بێتە كرن، چ مومكینە و چاوا بكن. كا كورد ب خوە وێ چاوا خوە ب رێك بێخن، كی وێ تەمسیلا وان بكە، ئەمێ ل گەل كی تەرەف بین، ئەم نكارن یەك ب یەك دیار بكن، ژ بەر هندێ ئەگەر تشتەك وها ببە، مە پر پێ خوەشە پشتەڤانیێ بكین.