یاسین مەجید: پەیوەندییەکانى نێوان هەولێر و بەغدا بەرەو کرانەوە دەچێت
عێراق – KDP.info / پەیوەندییەکانى نێوان هەولێر و بەغدا بەرەو کرانەوە دەچێت و چاوەڕوان دەکرێت، کێشە و گرفتەکانى نێوان هەردوولا لەم چەند رۆژەى داهاتوودا یەکلاببێتەوە، یاسین مەجید سەرکردە لەدەوڵەتى یاساى سەر بەنوورى مالیکى بە رۆژنامەى زەمانى لەندنى راگەیاند: هەموو کاتێک لە گشت بارودۆخە سەختەکان دا، پەیوەندى نێوان هەردوولا هەبووە و بەردەوام نامە لەنێوان هەرێمى کوردستان و بەغدا ئالوگۆر کراوە و هەڵویست و را لە گەڵ یەکتر خراونەتەروو، ئێستاش لەلایەن هاریکارانمانەوە بەردەوام نامە ئاراستەى یەکتر دەکەین و دیداریش دروست بووە، یاسین مەجید راشیگەیاند: پێم وایە پێشکەوتنێکى باش لە ئاساییکردنەوەى بارودخەکە و بەرەو پێشوەچوونى پەیوەندییەکان هاتۆتە ئاراوە و چاوەڕوان دەکرێت بەمنزیکانە بەیەکجارى کۆتایى بە کێشەکانى نێوان بەغدا و هەولێر بێت.
