لە دژی سوكایەتی كردن بە شۆڕشگێڕانی كورد ... خۆپیشاندان لە بەردەم كەناڵی نالیا ئه‌نجام درا
سلێمانی- تایبه‌ت بهKDP.info / لە دژی سوكایەتیكردن بە شۆڕگێڕانی كورد، هاووڵاتیانی شاری سلێمانی خۆپیشاندانێكی هێمنانەیان بۆ بەردەم كەناڵی نالیا ڕێكخست و خۆپیشاندەران ئاماژە بەوە دەكەن كە تائێستا ئەو كەناڵە بەفەرمی داوای لێبوردنی نەكردووە.
دوێنێ شەو كەناڵی نالیا بەبێ سانسۆر قسەی هاووڵاتییەكی گواستەوە كە جنێو و سوکایەتی بە مەلا مستەفای بارزانی تێدابوو. بۆیە ئەمڕۆ وەك ناڕەزاییەك بەرانبەر بە سیاسەتی ئەو كەناڵە هاووڵاتیانی شاری سلێمانی خۆپیشاندانێكی فراوانیان ئەنجام دا و یەكێك لە ناو خۆپیشانداندەران بەناوی سەمیر ئەحمەد بە kdp.info ڕاگەیاند: ئەوان وەك خەڵكی شاری سلێمانی نیگەرانن بەرانبەر بە سیاسەتی ئەو كەناڵە و داوادەكەن كەنالەکە داوای لێبوردن بكات، گوتیشی : ئێمە بەردەوام دەبین لە ناڕەزاییەكان و لە خۆپیشاندانیش بەردەوام دەبن، سەرەتا بە خۆپیشاندان دەبێت و دواتر بە شێوەی كۆكردنەوەی واژۆو كەمپین فشارەكان بەردەوام دەبێت.
جێی ئاماژەیە دوێنێ شەو لەکاتی بەرێوەچوونی بەرنامەکە، بێژەری بەرنامەکەی ئەو كەناڵە دوای پەیوەندییەكە، راستەوخۆ سوپاس و دەستخۆشی لە هاووڵاتییەکە كرد، كە لە پەیوەندییەكەی سوکایەتی بە کەسایەتی مێژوویی و باوکی رۆحی کورد کرد.
لە درێژەی باسەکە هەرئەم ئێوارەیە بێژەکەی كەناڵی نالیا باسی ئەو بابەتەی كرد و ئەوەی خستەڕوو داوای لە خەڵك کرد لەسەر كەناڵەكەیانەوە سوکایەتی و جنێو بەکەس نەدەن.
شیاوی باسە زۆرینەی پەیوەندییەكانی ئەمڕۆ ئیدانەی ئەو كەناڵە و ئەو كەسە دەكەن كە سوکایەتی بەو سەركردە مەزنەی کورد كردووە.
كارزان هەورامی.
