پێشبینی دەكرێت لە دانیشتنی بەیانی پەرلەمانی كوردستان راپۆرتە تایبەتییەکانی بودجە بخرێتە دەنگدانەوە

هەولێر- تایبەت بەKDP.info وابڕیارە كاتژمێر 11ی  پێش نێوەڕۆی بەیانی  یەكشەممە پەرلەمانی كوردستان دانیشتنێكی  تری ئاسایی خۆی تایبەت بە پرۆژە یاسای بودجەی ساڵی 2013 ی هەرێمی كورستان سازبدات و ئەندامێكی پەرلەمانیش پێشبینی دەكات بەیانی راپۆرتە تایبەتییەکانی بودجەی ئەمساڵ بخرێنە دەنگدانەوە.

 عومەر سدیق ئەندامی لیستی كوردستان لە پەرلەمانی كوردستان تایبەت بۆ kdp.info گوتی:   لە دواین دانیشتنی پەرلەمانی كوردستان بەڕێز سەرۆكی پەرلەمان پەرلەمانتارانی ئاگاداركردەوە كە كاتژمێر 11 ی پێش نیوەڕۆی رۆژی یەكشەممە كە دەكاتە بەیانی پەرلەمانی كوردستان دانیشتنێكی تری ئاسایی خۆی سازدەدات، كە تایبەتە بە بەردەوام بوونی  پەرلەمان لەسەر گفتوگۆكردن و بڕیاردان لەسەر پرۆژە یاسای بودجەی هەرێمی كوردستان بۆ ساڵی 2013 و بەپێی پەیڕەوی ناوەخۆ و ئەزموونی ساڵانی رابردوو لەم دانیشتنەی پەرلەمان  راپۆرتە تایبەتییەکانی  بودجەی ئەمساڵ بخرێتە دەنگدانەوە.

 گوتیشی: ئەگەر دەنگدان لەسەر راپۆرتەكان كۆتایی هات و ئەنجامەكەی بەڵێ بوو، پەرلەمان بەردەوام دەبێت لەسەر گفتوگۆكردنی ماددەو بڕگەكانی پرۆژە یاسای بودجەی ئەمساڵی هەرێمی كوردستان.

بڕوا بەرزنجی