نامەكا ڤەكری ژ هندەك كەسانێن ئێزدی ژبۆ چارەسەركرنەكا یاسایی بۆ كێشا سیمونا زاروك
پشتی رودانا كێشا رەڤاندنا ( سیمون ) ئو كچا ئێزدی یا سنێلە ل رۆژا 9 – 1 – 2013 ژ لایێ فروشیارەكێ گەروك یێ موسلمان ، وژبەر پەیدابوونا گەلەك هەلوێستا لدۆر كێشێ و گللەیا ئێزدیان ژ سستیا كریارێن جێبەجێكاری بۆ ڤەگەراندنا وێ، كو بویە جهێ پرسیارا چەندین لایەن و كەومەل و سەنتەرێن رۆشەنبیریی ئێزدیان ل وەلاتی و دەرڤە ، ئو وەك پشتەڤانی بۆ بەیانناما مێرێ ئێزدیان ل عیراقێ وجیهانێ میر تحسین سعید علی و هەول وپێنگاڤێن لایەنێن پەرلەمانی وحكومی وسیاسی وجڤاكی یێن ئێزدیان وغەیری وان، وپەیدابوونا هندەك هەلویستێن جورا وجور ژ لایێ هندەك كەنالێن راگەهاندنێ ئەوێن پێكاهاتیا جڤاكیا هەرێما كوردستانێ ل بەرچاڤ نەخستین،، و هەڤدەم لگەل راگەهاندنا ژێدەرەكی هایدار، كو سەروكێ حكومەتا هەرێمێ براستاوخۆ كێشە گرنگ بەرچاڤ وەرگرتیە ژ بۆ چارەسەریەكا دادپەروەرانە ؛ كۆمەكا كەسانێن ئێزدی ژ وەزیرێن خانەنشێن و پەرلەماناتار ودادوەر و مافپەروەر و رەوشەنبیر و ئەكادیمی و میدیاكار و رۆژنامەڤان و سیاسەتمەدار ئەڤ داخوازی ونامە پەسند وئارستەكرینە بۆ :
= سەروكاتیا هەرێما كوردستانێ
= پەرلەمانێ كوردستانێ
= حكومەتا هەرێما كوردستانێ
= جەماوەرێ كوردستانێ
1- گرنگیا پشتبەستن ب یاسیێ لدۆر هەموو لایەنێن كێشێ وراگەهاندنا ئەنجاما ب(شفافیەت) بزوترین دەم.
2- رژدبوونا پارستنا گیانێ سیمونا زاروك ئو وەك د بەیانناما میرێ ئێزدیان دە هاتی ،، ژبەركو لگور ئاین ودابونەریتێن ئێزدیاتی یێ "گونەه كوشتنا ئینسانی ژ بەركو خۆدێ پەخشندەرێ روحێ یە و كەس غەیریی وی نەشت ببەت".
3- داخوازی ژ بۆ بەستنا ( پەیمانەكا سۆزداریێ ) ب چاڤدێریا سەروكێ هەرێما كوردستانێ دناڤ بەرا هوز و عەشیرەتێن ئێزدیان ئو یێن موسلمانا، داكو رێك نەهێتە دان بو دوبارە بوونا ڤان كێشێن ترسناك ومەزن و كاریگەر ل سەر پێكهاتەیا كومەلایەتی یا هەرێما كوردستانێ.
4- رژدبوون ل سەر دارشتنا یاسایا بارێ كومەلایەتی یا ئێزدیان ل هەرێما كوردستانێ و عیراقێ، ژبۆ چەسپاندنا مافێن وان و بجه ئینانا وەكهەڤی و دادپەروەریا جڤاكی دناڤ بەرا هەمو هاولاتیاندا.
5- كار كرن ژ بۆ دارشتنا یاسایەكێ ژ بۆ پارستنا مافێن كەمینەیێن ئاینێ وتایبەتیێن وان ل هەرێما كوردستانێ وعیراقێ.
6- داخوازیا ئەنجامدانا كونفرانسەكی بۆ كەمینەیێن ئاینی ل هەرێما كوردستانێ داكو رەوشا وان یا كومەلایەتی و سیاسی و رۆەشەنبیری وئاینی بێتە ئالوگور كرن.
7- نەرازیبون و دلگرانیا مە ژ بەر بێ هەلویستیا هندەك دەزگەهێن راگەهاندنێ و رۆشەنبیر و رێكخراو كومەلێن دبوارێ مافێ مرۆڤی و رێكخراوێن گەشەپێدانا مەدەنی كار دكەن ل هەرێما كوردستانێ وعیراقی ژ پشتگوه بوونا وان ل كێشا رەڤاندنا زارۆكەكا سنێلە َ.
8- داخواز ژ كەنالێ (KNN) دكەن داخوازا لێبورینێ ژ ئێزدیان بكەت ژبەركو ئەو راپورتا وان هەستێ ئێزدیان ئێشاندیە.
9- داخواز ژ ئۆلدارێن موسلمانا و رۆشەنبیر وهزرڤانێن مەدەنی دكەن ژ بۆ راوستیێن لگەل برایێت خۆ یێن ئێزدی، وهوشیاركرنا جڤاكی بكەن دهەموو هەلكەفت وجه و مەنبەرا بۆ هەفكاریا چەسپاندنا بنەمایێن هەمەجوریا ئاینی وقەبول كرنا هەڤدو و پێكڤەژیانا ئاشتیانە،، وهەروەسا داخواز ژ حكومەتا هەرێمی دكەن پشتەڤانیا پروگرامێت خواندنێ وپرۆژەیێن گرێدایی براتیێ وپێكڤەژیانا ئاینی ل هەرێما كوردستانێ و عیراقێ بكەت.
10- پشتەڤانیا هەلویستَی سەروكێ هەرێما كوردستانێ و سەروكێ حكومەتا هەرێما كوردستانێ ژ بۆ ئەو گرنگیا داینە كێشا سیمونی ژ بۆ چارسەركرنا وێ ب زوترین دەم و ل گۆر یاسایێ ..
پەرستگەها لالش یا پیرۆز
8-2-2013
