دسالڤه‌گه‌ڕا وی دا په‌رده ل سه‌ر په‌یكه‌رێ د. فه‌وزی ته‌وفیق هاته لادان
ئامێدی- تایبه‌ت به KDP.info/ بهه‌لكه‌فتا سالڤه‌گه‌ڕا خودێ ژێ رازی د. فوزی توفیق، په‌رده ل سه‌ر په‌یكه‌ری هاته دان كو لبه‌ر ده‌رێ نه‌خۆشخانه‌یا ئامێدیێ هاتییه دانان.
ئه‌ڤ رێوره‌سمه ب ئاماده‌بوونا ئه‌یسه‌ر جه‌رجیس حمید ده‌ڤه‌ردارێ ئامێدیێ بوه‌كاله‌ت و د. نزار عصمت رێڤه‌به‌رێ گشتیێ ساخله‌مییا پارێزگه‌ها دهۆكێ و چه‌ند رێڤه‌به‌رێن داموده‌زگه‌هێن میری و هه‌ڤال و كه‌سوكارێن خودێ ژێ رازی ب خواندنا چه‌ند په‌یڤان و خواندنا شعره‌كێ ژ لایێ كوڕێ خودێ ژێ رازی ڤه هاته برێڤه‌برن.
دڤان رێوره‌سماندا . نزار عصمت گۆت: دروستكرنا ڤی په‌یكه‌ری بۆ ره‌حمه‌تی، وه‌فادارییه‌كا بچووكه بۆ وی و ئه‌و ل نك مه هه‌رده‌م یێ ساخه. هه‌روه‌سا كورتییه‌ك لسه‌ر ژیانا وی یا كاری دیاركر گۆت: ناڤلێكرنا بنگه‌هه‌كی ژی بناڤێ دوكتۆرێ خودێ ژێ رازی وه‌ك به‌رنامه ل نك مه هه‌یه و چ ده‌مێ ده‌رفه‌ت هه‌بوو دێ جێبه‌جێ كه‌ین.
هه‌روسا ده‌ڤه‌ردارێ ئامێدیێ و د. نه‌جیب ره‌شید رێڤه‌به‌رێ ساخله‌مییا قه‌زا ئامێدیێ به‌حسێ كارێ ره‌حمه‌تی كرن و خویاكرن كو ئه‌و دكارێ خوه دا یێ سه‌ركه‌فت بوو و شوونتبلێن وی ل هه‌ر لایه‌كێ ڤێ نه‌خۆشخانه‌یێ ددیارن و مرۆڤه‌كێ ماندوو نه‌ناس بوو و هه‌موو ده‌مێ خۆ بۆ خزمه‌تا خه‌لكێ ئامێدیێ ته‌رخانكربوو.
په‌یڤا مالباتا ره‌حمه‌تی ژی هاته خواندن و تێدا سوپاسییا لایه‌نێن به‌رهه‌ڤبووی كر. پێدڤی گۆتنێنه كو به‌ری دو سالا و پشتی ل هه‌ولێرێ پشكداری دكۆنگره‌یه‌كێ زانستیدا كری، ل رێیا زڤرینێ دا بۆ دهۆكێ و د روودانه‌كا دلته‌زیندا ل سه‌ر رێكا هه‌ولێرێ د. فه‌وزی ته‌وفیق گیانێ خۆ ژده‌ست دابوو.
دلدار رەشاڤەی
