هزار خیڤەتێن دی بو پەنابەرێن روژئاڤا هاتینەدانان

دهوك- تایبەت ب kdp.info/ رێڤەبەرێ كوچ و كوچبەرێن پارێزگەها دهۆكێ راگەهاند ئامادەكاری بو چێكرنا جهێن هزار خیڤەتێن دی بو ئاوارەیێن كەمپا دومیز یا پەنابەرێن روژئاڤا هاتینەكرن بو ئەو خێزانێن تازە دهێنە هەرێما كوردستانێ كو تێدا بهێنە ئاكنجیكرن.

محەمەد عەبدوڵڵا حەمو تایبەت بو kdp.infoئاشكراكر جهێ هەر خیڤەتەكێ هاتیە سەبەكرن و خیڤەت دگەل حەمام و wcو لێنانگەه بو هاتینە دروستكرن ل ڤان روژان دێ پەنابەر تێدا هێنە ئاكنجیكرن و هەموو پێداویستێن دەستپێكی ژ گەهاندنا جادە و كارەب و ئاڤ زێدەباری دابەشكرنا كەل و پەلێن خوارنێ و ڤەخوارنێ و ناڤ مالێ و گازا سپی ل سەر پەنابەران.

ناڤبری ئیماژە ب وێ چەندێ ژی كر هژمارا ئەو خیڤەتێن فەرمی ل كەمپا دومیز هاتینە دانان گەهشتی یە سێ هزار خیڤەتان و پتر ژ هزار خیڤەتان ژی ب عەشوائیی هاتینە دانا ئەو یەك ددەمەكێ دا بو كو هندەك روژان پتر ژ 500 پەنابەر دهاتنە كەمپێ دا ئەم نەشیان بو هەمیان دابینبكەین مە خیڤەت د دانە پەنابەران وان بخو ب رەنگەكێ نە رێكخستی داناینە هاتا نوكە ژی ماینە وەسا.

ل دور هاتنا پەنابەران بو هەرێما كوردستانێ حەموو ئاشكراكر تانوكە پتر ژ 80 هزار پەنابەرێن روژئاڤایێ كوردستانێ ب رێكا سنورێ پارێزگەها دهۆكێ هاتینە هەرێمێ ژوانا پتر ژ 60 هزار پەنابەران ل كەمپا دومیز هاتینە توماركرن و خوجهكرن.

ئایا حكومەتا هەرێما كوردستانێ چ بریار نەدانە كو كەمپەكا دی بو پەنابەرێن روژئاڤا بهێتە ڤەكرن رێڤەبەرێ كوچ و كوچبەرێن دهۆكێ دازانین تا نوكە ژلایێ حكومەتا هەرێما كوردستانێ ڤە چ بریار نە دەركەفتی نە بو ڤەكرنا كەمپەكا دی چ ل دهۆكێ یان ل پارێزگەهێن دی یێن هەرێمێ، هەر چەندە مە چەندین جارا داخاز كریە كو خیڤەتگەهەكا دی بو پەنابەرێن روژئاڤا بهێتە ڤەكرن بەلێ چ دیارنینە براستی خیڤەتگەها دومیز یا گەهشتی یە رادەكێ كو ڤەحەواندنا پەنابەران تێدا گەلەك زەحمەت كەفتی یە.

گوت ژی هاتنا پەنابەران بو هەرێما كوردستانێ یا بەردەوامە نوكە روژانە 400 تا 500 پەنابەر دهێنە هەرێما كوردستانێ ل كەمپا دومیز دهێنە توماركرن و ئاكنجیكرن.

 

عەبدوڵڵا نهێلی