بەڕێوبەرایەتی ھاتووچۆی ھەولێر: ھیچ نوسراوێکمان بەدەست نەگەیشتووە ئەگەر شوفێر جگەرە بکێشێ سزابدرێ
تایبه‌ت به KDP.unfo/ بەڕێوبەرایەتی ھاتووچۆی سلێمانی بڕیاریداوە لەسەرەتای مانگی داھاتوو ھەر شوفێرێک جگەرە لەناو ئۆتۆمبێل بکێشێ سزادەدرێ، لەبەرامبەردا بەرێوبەری راگەیاندنی ھاتوچۆی ھەولێر دەڵێت: تائێستا ھیچ نوسراوێکمان لەمبارەیەوە بەدەست نەگەیشتووە و ھەر بریارێکیش بدرێ پێویستە لەبەرێوبەرایەتی گشتی ھاتووچۆی ھەرێمی کوردستان بۆ ھەرسێ پارێزگا دەربچێت و ناکرێ ھەر پارێزگایه‌ک لەخۆیەوە بریار دەربکات.
ھۆگر عەزیز بەڕێوبەری راگەیاندنی ھاتووچۆی ھەولێر لەلێدوانێکی تایبەتدا بۆkdp.infoرایگەیاند: تاوەکو ئێستا ھیچ نوسراوێکیان بەدەست نەگەیشتووە کە لەسەره‌تای مانگی داھاتوو ھەر شوفێرێک لەناو ئۆتۆمبێل جگەرە بکێشێت سزا بدرێ و ئاماژەی بەوەش کرد، ھەر بریارێک بدرێت پێویستە بۆ سەرجەم پارێزگاکانی ھەرێمی کوردستان بێت نەک تەنھا بۆ پارێزگایه‌ک.
ھۆگر عەزیز گوتیشی: بەڕێوبەرایەتی ھاتووچۆی ھەرێمی کوردستان ھەر بڕیارێک دەربکات سەرەتا بۆ ئەوان دێت پاشان بۆ پارێزگاکانی دیكه، پێویستە ھەموو پارێزگاکان پێیەوە پابەندبن و ناکرێ لەپارێزگایه‌ک شوفێر سزابدەرێ و لەپارێزگایه‌کی دیكه سزا نەدرێ.
بەڕێوبەرایەتی ھاتووچۆی سلێمانی بڕیاریداوە لەسەرەتای مانگی داھاتوو ھەر شوفێرێک لەناوئۆتۆمبێلەکەی وەک قۆناغی یەکەم جگەرەبکێشێ بەبڕی10ھەزار دینار سزادەدرێ.
بڵند ئیبراھیم
