ئەنجوومەنی ئاسایش سەركۆنەی كوشتارگەی حۆلە دەكا

ئەنجوومەنی ئاسایشی سەر بە نەتەوە یەكگرتووەكان لە كۆبوونەوەی ئێوارەی دوێنێیدا كوشتارگەی گوندی حۆلەی نێزیك حمسی سەركۆنە كرد كە تێیدا 108 كەس كە زۆربەیان منداڵبوون كوژران.

ئەنجوومەنی ئاسایش لە بەیاننامەیەكدا بە توندی سەركۆنەی سووریای كرد بەهۆی تەقەكردن لە گەڕەكە ئاوەدانەكان كە بەهۆیانەوە لە گوندی حۆلەی نێزیك حمس دەیان پیاو و ژن و منداڵ كوژران و سەتانی تریش بریندار بوون.

هەر لە بەیاننامەكەدا هاتووە: بەكارهێنانی هێز بەو شێوە زەقە دژ بە هاووڵاتییانی سڤیل پێشێلكردنی یاسا ناودەوڵەتییەكان و پابەندنەبوونی حكوومەتی سووریایە بە بڕیارەكانی ئەنجوومەنی ئاسایش.

حكوومەتی سووریا رەتی كردەوە ئەو قەسابخانەیە لەلایەن ئەوەوە ئەنجام درابێ و قاعیدە و "رێكخراوە تیرۆریستییەكان"ی بە ئەنجامدانی تۆمەتبار كرد.