باڵیۆزى ئه‌مه‌ریكا له عێراق له شكستهێنانى هێزه سیاسیه‌كانى عێراق بۆ یه‌كنه‌گرتنیان له‌سه‌ر یه‌ك جۆره سیاسیه‌ت هۆشداریى دا
جیمس جێفرى باڵیۆزى ئه‌مه‌ریكا له به‌غدا له‌باره‌ى شكستهێنانى هێزه سیاسیه‌كانى عێراق بۆ یه‌كنه‌گرتنیان له‌سه‌ر یه‌ك جۆره سیاسیه‌ت له وڵات هۆشداریى دا و داواشى له هێزه سیاسیه‌كان كرد رێگایه‌كى ئاشتى بۆ چاره‌سه‌كردنى كێشه سیاسیه‌كانی نێوانیان بگرنه‌به‌ر.
جیمس جێفرى له كۆنگره‌یه‌كى رۆژنامه‌وانیدا به بۆنه‌ى كۆتایی هاتنى كاره‌كانى له عێراق، گووتى: ئه‌مه‌ریكا له‌ساڵى دووهه‌زار و چواره‌وه تا ئێستا چاودێرى ره‌وشى ناوخۆى عێراق ده‌كات و ئه‌وه‌ى تا ئێستا به‌ده‌ست هاتووه له رێگه‌ى گه‌لى عێراقه‌وه بووه ، هۆشدارى ئه‌وه‌شى دا كه ئێستا چه‌ند مه‌ترسیه‌ك له‌سه‌ر عێراق هه‌یه و له هه‌مووشیان گرنگتر ئه‌وه‌یه كه هێزه سیاسیه‌كان له‌باره‌ى گرتنه‌به‌رى یه‌ك سیاسیه‌ت له وڵات یه‌كیان نه‌گرتووه.
جیمس جێفرى گووتیشى تا ئه‌و كاته‌ى عێراق له‌سه‌ر شێوازى ئاشتی و دیموكراتى به‌رده‌وام بێت، ئه‌وا پاڵپشتیه نێوده‌وڵه‌تیه‌كانیش بۆ ئه‌و وڵاته به‌رده‌وام ده‌بێت و دووپاتیشى كرده‌وه كه واشنتۆن ده‌ست له بڕٍیاره سیاسیه‌كانى ناوخۆى عێراق وه‌رنادات و هیچ چاره‌سه‌رێكى دیاریكراویش ناسه‌پێنێت.
باڵیۆزى ئه‌مه‌ریكا له به‌غدا داواشى له سه‌ركرده سیاسیه‌كانى عێراق كرد رێگایه‌كى ئاشتى بۆ چاره‌سه‌كردنى كێشه سیاسیه هه‌ڵپه‌سێردراوه‌كانى وڵات بگرنه‌به‌ر.
