ئەمڕۆ مانۆری دەریاوانی ئێران لە گەرووی هورمز دەستیپێکرد
رۆیتەرز- ئاژانسەکان/ بەپێی هەواڵێکی ئاژانسی دەنگوباسی ئێرانی، کۆماری ئیسلامی ئێران ئەمڕۆ هەینی دەستی بە مەشقی دەریاوانی کردووە و ئەم مەشقە شەش رۆژ دەخایەنێت و بەرنامەکەشی لە گەرووی هورمز بەرێوەدەچێت. ئامانج لەم مانۆرە نیشاندانی توانا و هێزی سەربازی ئێرانە، بەتایبەتیش لە چۆنیەتی مامەلەکردن لەگەڵ ئەم گەروە کە نەوت و غازی پێدا تێدەپەڕێت.
سەرچاوەکە لە زاری حەبیبوللا سیاری سەرکردەی هێزی دەریاوانی ئێران گوتیەتی: ئەمڕۆ هەینی تاکو رۆژی چوارشەممە لە نیو ملیۆن کیلۆمەتری چوارگۆشە تاکو گەرووی هورمز و کەنداوی عەمان و ناوچەکانی باکوری ئۆقیانوسی هادی، مانۆرەکە درێژدەبێتەوە. سیاری رایگەیاندووە کە ئامانج لەم مانۆرە دەرخستنی توانا و هێزی سەربازی هێزە چەکدارەکانی ئێرانە، بۆ چۆنیەتی داکۆکیکردن لە سنوری ئێران، هەرچەندە ئەوان نامەی ئاشتی و دۆستایەتیان بۆ وڵاتەکانی دراوسێش هەیە.
گەلێکجاران بەرپرسە ئێرانەییەکان هەڕەشەی ئەوەیان کردووە کە گەرووی هورمز دادەخەن کە هەنووکە %40ی نەوتی جیهانی پێداتێدەپەڕێت.
