بەهۆی پێكدادانێكی چەكداری دەروازەكانی شاری سامەڕا داخران
سامەڕا – تایبەت بە / kdp.info سەرچاوەیەكی ئەمنی لە شاری سامەڕا رایگەیاند : پێش نیوەڕۆی ئەمڕۆ دووشەممە، لەدەرنجامی پێكدادانێكی چەكداری لەنێوان پۆلیس و ژمارەیەك چەكداری نەناسراو دوو پۆلیس كوژران. سەرچاوەكەی پۆلیس بە ئاژانسی هەواڵی عێراقی راگەیاند: شەڕەكە لەنزیك منارەی سامەڕا بووە، كاتێك گروپێكی چەكداری نەناسراو تیمێكی گەرۆكی پۆلیسی ئەو شارەی كردۆتە ئامانج و دواتر هێرشیان دەكەنە سەر و بەهۆیەوە دوو پۆلیس كوژران و ژمارەیەكی دیكەش برینداربوون و زەرەر و زیانی گروپە چەكدارەكەش نەزانراوە، سەرچاوەكە گوتیشی: بەئامانجی دەستگیركردنی تاوانبارانی ئەو كردارە چەكدارییە، پۆلیسی سامەڕا دەروازەكانی شاری بۆ ماوەیەك داخستووە. شایەنی باسە شاری سامەڕا كە سەر بە پارێزگای سەڵاحەددینە و 170كم لەبەغدا دوورە، ناوە ناوە كردەوەی تیرۆریستی جۆراجۆری تێدا روودەدات.
