لەشكەرێ توركیا دەڤەرێن نێروە و رێكان و پشتا چیایێ كورەژاری توبباران كرن

ژێدەرەكی ژ شارەدێیا دێرالوكێ راگەهاند ئەڤرۆ چارشەمبی لەشكەرێ توركی چەندان دەڤەرێن سەر ب سنوورا دێرالوكێ ل پارێزگەها دهۆكێ ڤە توبباران كرن.

مەحموود نهێلێ رۆژنامەڤانێ ئاكنجی ل دێرالوك بۆ ئاژانسا كوردستان یا دەنگوباسان (ئاكانیوز) گوت، ل سات 10،30 سپێدەیا ئەڤرۆ چوارشەمبی لەشكەرێ توركیا دەڤەرێن نێروە و رێكان و پشتا چیایێ كورەژاری و گوندێ هێتیتێ توبباران كرن.

نهێلی خویا كر، دەڤەرێن هان تنێ 14 كیلومەتران ژ دێرالوكێ د دویرن، لێ چ كەس لێ ئاكنجی نینن.

دیاركر ژی، توببارانكرنا هان هەیا سات 12:00 یا بەردەوامبوو و هەیا نها زیانێن وێ توبباران كرنێ نەهاتییە زانین.