Kdp.infoهۆكاری بایكۆتكردنی پرۆژەی پەرلەمانی گەنجان لەلایەن زیاتر لە 200 رێكخراوەوە بڵاودەكاتەوە
دوای ئەوەی لە رۆژانی رابردوو رێكخراوی undpبەهاوكاری چەند رێكخراوێكی كۆمەڵی مەدەنی هەڵسا بە ئەنجامدانی كۆبونەوەیەك بۆ چەندین رێكخراوی كۆمەڵی مەدەنی و چالاكوانانی بواری لاوان و گەنجان بەمەبەستی دامەزراندنی پەرلەمانی گەنجان لە هەرێمی كوردستان هاوشێوەی عێراق، بەڵام لە كۆبونەوەكانی دواتری هاوشێوەدا زیاتر لە 200 رێكخراوی كۆمەڵی مەدەنی بایكۆتی ئەو پرۆژەیان كرد و وتەبێژی فیدراسیۆنی رێكخراوە ناحكومییەكانیش هۆكاری ئەو بایكۆتكردنە دەخاتە روو.
سیروان گەردی وتەبێژی رێكخراوە ناحكومییەكانی كوردستان تایبەت بۆ(kdp.info) وتی" ئێمە لە سەرەتاوە لەبناغەی ئەو پرۆژەیە لەگەڵ بووین و لەكۆبونەوەی سەرەتادا باس لە چەند خاڵێك كراو هەموو لەسەری رازی بووین، بەڵام دواتر ئێمە بۆمان دەركەوت كە جیاوازی لەنێوان شارەكان بەتایبەتی هەولێر و سلێمانی كراوەو بەجۆرێك پشكی ئەندامانی پەرلەمانی گەنجان لە سلێمانی زیاتردانراوە لە هەولێر كە ئەمە بۆ ئێمە جێگای سەرنج بوو ئەمە یەكێك بوو لەهۆكارەكان كە پێویستە هیچ جیاوازیەك لەنێوان شار و لایەنی سیاسی و هیچ شتێكی تر نەكرێت.
وتیشی" هۆكارێكی تری ئەو بایكۆتكردنەی ئێمە بریتی بوو لەوەی كەلە دوای كۆبونەوەكانی رێكخەرانی پرۆژەكە بۆمان دەركەوت كە هەریەك لە یەكێتی لاوان و یەكێتی گەنجان وەكو دوو رێكخراو كە ژمارەیەكی یەكجار زۆر لاو و گەنج ئەندامی ئەو دوو رێكخراوەن پەراوێزخراون و خراونەتە دەرەوەی بازنەی پرۆژەكە، ئێستاش ئێمە ئامادەین بەشداربین لەو پرۆژە گرنگە بەمەرجێك ئەو خاڵانەی كە بۆتە نیگەرانی ئێمە چارەسەر بكرێت.
