پەیڤدارێ بەرەیا توركومانی: كو نووری مالكی نە هاتیە راسپاردن ب ناڤێ توركومەنان بئاخڤە
د داخویانیەكێ دە عەلی مەهدی پەیڤدارێ فەرمیێ بەرەیا توركومانی یا ئێراقی راگەهاند كو نووری مالكی نە هاتیە راسپاردن ب ناڤێ توركومەنان بئاخڤە و مافێ وێ یەكێ ژی نییە. هەروەها نافهاتی هێبەتیا خوە ژی ل هەمبەر وێ یەكێ دیاركر كو مالكی ئەو ماف دایە خوە بناڤێ توركومەنان داخویانیان بدە و ب ئاخڤە.
مەهدی ئەو یەك ژی خویاكر كو خەلكێ كەركووكێ ئەو ماف هەیە بئاخڤن و بەحسا باژێرێ خوە بكن و بریاران ل دۆر رەوشا خوە بگرن. د ڤی واری دە ژی بالكشاندە سەر ئەزموونا سەركەتی یا گرێدایی كرینا هێزا ئەلكتریكێ ژ كەسەكێ ڤەبرهێنەر ل هەرێما كوردستانێ كو ب رێ یا وی هێزا ئەلكتریكێ ژبۆ وەلاتی یێن كەركووكێ هاتیە گارانتی كرن. ئەڤ ئەزموون ژی ب ئاواكێ باش وێ یەكێ زەلال دكە كو خەلكێ كەركووكێ بخوە ئەو دكارن بریارێن ل دۆر باژێرێ خوە بگرن، هەتا كو د وارێ ئاسایش و پاراستنا جانێ وەلاتێن خوە دە ژی. پەیڤدارێ فەرمیێ بەرەیا تۆركومەنی ئەو یەك ژی دازانین كو كەركووكێ رەوشەكە تایبەتا خوە هەیە، لەوما بریارێن كو ل دۆر وێ ژی تێنە گرتن دڤێ گەلەكی تایبەت بن، بالكشاندە سەر وێ یەكێ كو شاندنا هێزان ژبۆ كەركووكێ ژ هەر چاڤیكانیەكێ، پرسا وێ چارەسەر ناكە. هەڤدەم بالكشاندە سەر وێ یەكێ كو دامەزراندنا فەرمانداری یا ئۆپەراسیۆنێن كەركووكێ رێ یا هەری باشە ژبۆ برێڤبەربرنا دۆسێیا ئەمنی ل پارێزگەهێ و هەر ئەڤ ژی پێشنیازا گروپا توركومانی بوو د جڤاتا پارێزگەهێ دە. تەكەز ژی كر كو تو كەسەك نكارە بریارا شەری ل دژی هەر پێكهاتەكە دن ل ئێراقێ بدە، ژبەر كو جڤاتا نوونەران و سەرۆكاتیا كۆمار و وەزیرێن هەر پێكهاتەكێ، هەموو ئەڤ ئالی دكارن بهەڤرە بریارەكە وەها بدن، لەوما دانوستان بێ گەفلێكرن، ئەو دێ رێ یا چارەسەری یا پرسان بە. بریارا دامەزاراندنا ئۆپەراسیۆنێن دجلە ل كەركووكێ بریارەكە سیاسی بوویە ژبال مالكی ڤە ب ئارمانجا جڤاندنا دەنگێن بێتر ژ خوە رە د هەلبژارتێن جڤاتێن پارێزگەهان دە كو بریار ئەوە پشتی چار مەهێن دن بێنە كرن، د هەمان دەمێ دە عەلی مەهدی دووپات كر نها مالكی دەست ب پێكانینا هن شاشیان ل سەر ئاستا ناڤخوە و دەرڤە ژی دكە. ژبۆ ڤێ یەكێ ژی بەری یا هن رۆژان مالكی بریاردا رێ ب بالەفرا وەزیرێ ئەنەرژی یا تركیێ نەیێ دان ل هەرێما كوردستانێ بنیشە. لێ نها ئەو ل هەمبەر ڤێ یەكێ بانگا سەركردێ ئۆپۆزسیۆنا تركیێ كریە ژبۆ كو سەرەدانا بەغدایێ بكە، ئەڤ كار ژی ب ئاوایەكێ زەلال خویادكە كو مالكی چاوا یاریێ ب سیاسەتا وەلات دكە. تێ زانین ئەڤ كارڤەدانا بەری یا توركومانی ل ئێراقێ ل هەمبەر وێ داخویانی مالكی تێ دەما كو د پرێس كۆنفرانسەكێ دە راگەهاندی مە ب كوردان رە گوتیە ئەگەر كو ڤێ جارێ شەرەك چێ ببە دێ ببە شەرێ كورد و عەرەبان، ژبەر كو وەكە مالكی گۆتی دەڤەرێن تێكهەل ئەو د كۆكا خوە دە دەڤەرێن عەرەب و توركومەنانە و ئەگەر كو شەر چێ ببە ئەم ناگەهین تو ئەنجامەكێ و توركومەن و عەرەب ژی هەر وەها دەست بەردایی ل هەمبەر وێ رەوشێ نا مینن.
