وتەبێژی هاوپەیمانی كوردستان: هەوڵەكانی هەندی لایەنی عێراقی بۆ دروستكردنی شەڕ لەنێوان كورد و عەرەب شكستی هێناوە
لەكاتی دەستپێكردنی گرژییەكانی نێوان هەولێر و بەغدا تاوەكو ئێستا بەچەند شێوازێكی جۆراوجۆر هەندێک لایەنی سیاسی عێراق لەهەوڵدان بۆ قۆستنەوەی ئەو دۆخە بۆ دروستكردنی زۆرترین دوژمن بۆ نەتەوەی كورد و سەرهەڵدانی شەڕ لەنێوان كورد و عەرەب لە عێراق، بەڵام تاوەكو ئێستا ئەنجامێكی وەهای نەبووە شیاوی باسكردن بێت و وتەبێژی هاوپەیمانی كوردستانیش لەبەرامبەر ئەمە دەڵێت سەرجەم ئەو هەوڵانە شكستیان هێناو ئەو بابەتە یەكلایی كراوەتەوەو هەڵوێستەكانی سەرۆك بارزانی و یەكڕیزی لایەنە كوردییەكان و وهەڵوێستی مەرجەعە شیعییەكان رۆڵێكی گرنگی لەم بوارەدا هەبوو.
موئەیەد تەیب وتەبێژی لیستی هاوپەیمانی كوردستانی لە ئەنجوومەنی نوێنەرانی عێراق تایبەت بۆ (kdp.info) گوتی "لەماوەی رابردوودا لەمیانی گرژییەكانی نێوان هەولێر و بەغدا چەند لایەنێكی سیاسی لە هەولدابوون بۆ بەرپاكردنی شەڕ لەنێوان كورد و شیعەو كورد و عەرەب، ئەمەش بە قۆستنەوەی ئەو گرژیانە بەڵام سوپاس بۆخوا ئەو هەوڵانە هیچیان سەرنەكەوتن و شكستیان هێناو هێزی دانیشتن و گفتوگۆ بەسەر هێزی شەڕدا سەركەوت بۆ ئەمەش هەڵوێستی مەرجەعە شیعییەكان بە گشتی و سستانی بەتایبەتی و یەكڕیزی نێوان قەوارەو كوتلە كوردییەكان هۆكارێكی سەرەكی و گرنگ بوو هەروەها هەڵوێستی جەنابی سەرۆك بارزانیش لەم نێوەندەدا هۆكارێكی دیکەی هەرە گرنگ بوو.
ناوبراو لەمیانەی لێدوانەكەیدا گەشبینی خۆی و هاوپەیمانی كوردستانی بۆ چارەسەركردنی بارودۆخەكە لەرێگای گفتوگۆ و دانوستان نیشانداو گرتنەبەری رێگاچارەی دیموكراسیانەی بە باشترین چارەسەر بۆ دۆخەكە دانا.
هەولێر- بڕوا بەرزنجی
