كۆبوونەوەی لیژنەی باڵای هاوبەش
لیژنەی باڵای هاوبەشی پارتی دیموكراتی كوردستان و یەكێتی نیشتمانی كوردستان وێڕای ئەوەی بە شێوەیەكی ئەرێنی پێكهێنان و كاروبارەكانی تاكوو ئێستای لیستی هاوبەشی حزبە كوردستانییەكانی بۆ هەڵبژاردنی ئەنجوومەنی پارێزگاكانی عێراق و بەتایبەتیش لە ناوچە دابڕێنراوەكاندا هەڵسەنگاند هەروەها ئەوەیشی دووپات كردەوە كە پارتی و یەكێتی بۆ سەركەوتنی ئەم پێكهاتە یەكگرتووە كوردستانییە لە هیچ هاوكاری و پشتیوانییەك درێغی ناكات.
هەڵوێستی پارتی و یەكێتی بۆ یەك لیستی حزبە كوردستانییەكان لە ناوچە دابڕێنراوەكاندا، پاشنیوەڕۆی ئەمڕۆ رێكەوتی 3ی كانونی یەكەمی 2012، لە هەولێر، لە پێنجەمین كۆبوونەوەی لیژنەی هاوبەشی پارتی دیموكراتی كوردستان و یەكێتی نیشتمانی كوردستان دووپات كرایەوە.
هەروەها لە كۆبوونەوەكەدا بەدواداچوون بۆ بڕیارەكانی كۆبوونەوەكانی پێشووتر و، كاری لیژنە فەرعییەكان كراو چەند پرسێكی نوێش تاوتۆ كران و بڕیاری پێویستیان لەبارەوە درا.
لە لایەكی تریشەوە بڕیار درا ئەم كۆبوونەوە هاوبەشانە لەسەر ئاستی لیژنەی باڵا بەردەوام دەبێ و چەند پرسێكیش دیاریكران كە لەو كۆبوونەوانەدا تاوتۆ بكرێن و بڕیاری پێویستیان لەبارەوە بدرێ و رێوشوێن بۆ جێبەجێكردنیان دابنرێ.
جگە لە پەیوەندییە دوو قۆڵییەكانی نێوان پارتی و یەكێتی هەروەها كۆبوونەوەی لیژنەی باڵای هاوبەش بە ووردی دوا پێشهات و لێكەوتەكانی قەیرانی نێوان بەغداد و هەرێمی كوردستانی تاوتۆ كرد و بە تایبەتیش لەسەر ئەو پرسانە هەڵوەستەی كرد كە پەیوەندییان بە مانەوەی تاكو ئێستای قیادەی ئۆپەراسیۆنەكانی دیجلە و دوا لێدوانەكانی سەرۆك وەزیرانی حكوومەتی فیدراڵەوە هەبوو.
لەم چوارچێوەیەدا رێگەچارەی ئاشتی و دیالۆگ و پەیوەندی هاوپەیمانانەی كورد و شیعە دووپات كرایەوە و جەخت لەوە كرا كە هیچ هێزێك ناتوانێ ململانێكان بكاتە ململانێی نێوان ئەم دوو پێكهاتە هاوپەیمانە یان بیكاتە ململانێی نێوان كورد و عەرەب.
